Арассыыйа Бэрэсидьиэнэ Владимир Путин 2020 сылы Өйдөбүнньүк уонна Албан Аат сылынан биллэрбитэ. Оттон өрөспүүбүлүкэҕэ быйыл ыам ыйыттан эһиил ыам ыйыгар диэри Ил Дархан Айсен Николаев Ыйааҕынан ыытыллар Улуу Кыайыы сылын чэрчитинэн Кыайыы Знамята Мэҥэ Хаҥалас улууһугар атырдьах ыйын 20 күнүгэр туттарыллыбыта уонна 10 күн устата улуус бары нэһилиэктэринэн сылдьан, атырдьах ыйын 30 күнүгэр Амма улууһугар туттарылынна.

Улууспутугар Кыайыы Знамятын биир бастакынан Ороссолуода нэһилиэгэр көрүстүлэр.  Үрдүк суолталаах тэрээһиннэргэ улууспут эдэр армеец хамсааһын иитиллээччилэрэ бары нэһилиэктэргэ барытыгар актыыбынай кыттыыны ыллылар.

Эдэр көлүөнэҕэ ананар бэлиэ түгэннэргэ эҕэрдэ тылларын улууспут  салалтата уонна Уус Алдан улуустарын байыаннай комиссариатын салайааччы Аял Дмитриевич Петров, улуустааҕы бэтэрээннэр сэбиэттэрин бэрэссэдээтэлэ Маргарита Михайловна Максимова анаатылар.

Түмүктүүр атырдьах ыйын 30 күнүгэр  өрөспүүбүлүкэтээҕи эстафета Майа, Чүүйэ, Наахара, Бырама нэһилиэктэринэн сылдьан баран салҕыы Кыайыы Знамятын эстафетата, Амма улууһугар айаннаата.

Николай Бугаев