Кулун тутар 5 күнүгэр Ф.Г. Охлопков аатынан Майа орто оскуолата ХИФУ (Хотугулуу-Илиҥҥи федеральнай университет) ыалдьыттарын көрсөн, үөрэнээччилэр уонна төрөппүттэр инники олохторугар сырдык суолу арыйар бэлиэ тэрээһин буолла. "ХИФУ Биир Күнэ" диэн ааттаах бу күҥҥэ университет 15 факультетын бэрэстэбиитэллэрэ кэлэн, улуус 20 оскуолатын 8-11 кылааһын 275 үөрэнээччитигэр уонна төрөппүттэригэр сэргэх көрсүһүүлэри тэрийдилэр.

Бу тэрээһин сүрүн сыала – үөрэнээччилэри идэ талыытыгар көмөлөһүү, университет иһинэн баар бары хайысхалары билиһиннэрии, үөрэх хаачыстыбатын тупсарыы уонна инники олохпут сайдыытыгар болҕомто ууруу.

Факультеттар араас интерактивнай площадкалары тэрийдилэр: маастар-кылаастар, викториналар, бырайыактары кэпсээһин, научнай эксперименнэр. Оҕолор бэйэлэрин интэриэстэринэн араас хайысханы талан, билиилэрин-көрүүлэрин кэҥэттилэр. Төрөппүттэр эмиэ университеты кытта чугасыһан, оҕолоро ханнык идэни талалларыгар сөптөөх сүбэни-аманы ыллылар.

Маннык тэрээһиннэр биһиэхэ инникигэ эрэллээхтик хардыылыырбытыгар, төрөөбүт дойдубутугар туһалаах дьон буола улаатарбытыгар көмөлөһөллөр.

"ХИФУ Биир Күнэ" тэрээһин биһиэхэ умнуллубат бэлиэ күнүнэн хаалла. Үөрэнээччилэр, төрөппүттэр уонна учууталлар бары биир санаанан университекка махталларын биллэрдилэр.

Даша Сидорова, Майатааҕы Ф.Г. Охлопков аатынан орто оскуолатын 9 «а» кылаас үөрэнээччитэ