Уол оҕо инники кэскилбит, дурда–хахха буолуохтаах эрэлбит буолар. Уолу спортка сыhыарар, төрөөбүт дойдутун таптыыр, бэриниилээх, тулуурдаах, сымса буола улаатарыгар кыра эрдэҕиттэн араас өрүттээх үлэ ыытыллар. 

Муус устар 26 күнүгэр Төңүлүтээҕи «Олимпионик» оҕо сайдар киинигэр улуус иhинэн «Хоhуун уол» военнай-спортивнай күрэх, бэлэмнэнии бөлөх уолаттарыгар буолан ааста. Хаптаҕай «Хомусчаан», Аллараа Бэстээх «Солнышко», «Сказка», Майа «Мичил», Төхтүр «Мичил», Тумул «Куоласчаан», Балыктах «Звездочка», Дьабыыл «Кэскил», Төӊүлү «Чэчир», «Олимпионик» детсадтарыттан барыта 10 оҕо кытынна.

Уолаттар ох курдук оӊостон, бэлэмнэнэн кэлэн күрэх 7 түhүмэҕэр бэйэлэрин кыахтарын көрдөрдүлэр. Ол курдук: «Будущий защитник» I түhүмэххэ уолаттар Россия гимнин толордулар, строевой бэлэмнэрин көрдөрдүлэр. II түhүмэх военизированнай эстафетаҕа уолаттарга ким түргэнин, сымсатын судьялар бириэмэни көрөн быhаардылар. Российскай Армия историятын, военнай техникатын, войскаларын төhө билбиттэрин III түhүмэх быhаарда. IV түhүмэххэ площадкаҕа тахсан гранатанан ырааҕы кыыратыыга күрэхтэстилэр. Имигэс тарбах, булугас өй, V түhүмэххэ быаны сүөрүүгэ көhүннэ. Маска тоhоҕону саайыы, хаптаhыны эрбээhин саамай тыӊааhыннаах түhүмэх тэринэн буоллулар.

Күрэхтэhии түмүгүн дьүүллүүр субэ (Төңүлү орто оскуолатын физкультураҕа уонна военнай үөрэхтээhиҥҥэ урдуку категориялаах учуутала, ССРС спордун маастара Эверстов В.С., физкультура уонна спорт туйгуннара, Төңүлү орто оскуолатын үрдүкү категриялаах уучууталлара Попов С.С., Иванов С.И.) быhаарыытынан III миэстэ Гоголев Валера Төңүлү «Чэчир» (сал. Шестакова Д.В.), II миэстэ Яковлев Денис Майа «Мичил» (сал. Герасимова Н.В.) I миэстэ Мохначевский Айсен Балыктах «Звездочка» (сал. Стручкова Л.И.), уонна «Хоhуун уол» ааты Борисов Алеша Төӊүлү «Олимпионик» детсад иитиллээччитэ (сал. Игнатьев И.И) ыллылар. Кыттааччыларга анал ааттары анааhын быйылгы күрэх уратытынан буолла, ол курдук «Дьулуурдаах уол» - Беляев Мирослав (Аллараа-Бэстээх, «Солнышко»), «Дьаныардаах уол» - Никифоров Арчын (Тумул «Куоласчаан»), «Тулуурдаах уол» - Дмитриев Эрчим (Хаптаҕай «Хомусчаан») уонна «Эрчимнээх уол» - Свешников Кирилл (Дьабыыл «Кэскил») ылан үөрэн-көтөн тарҕастылар.