Кулун тутар 27-28 күннэригэр Тыыллыма орто оскуолатын көҕүлээhининэн, ХИФУ тыл уонна култуура үнүстүүтэ, культурология кафедрата, Олоӊхо үнүстүүтэ, улуустааҕы Олоӊхо Дьиэтэ, Тыыллыма дьаhалтата өйөөhүннэринэн сонун тэрээhин ыытылынна. «Куйуур олоӊхотун» түhүлгэтигэр Амма, Горнай, Чурапчы, Бүлүү, Мэӊэ-Хаӊалас ыччаттара кытыннылар: Адамова Валентина Ивановна, Винокуров Айталын Николаевич, Петрова Айта Семеновна, Михайлова Туйаара Семеновна, Захаров Анатолий Анатольевич, Иванов Станислав Алексеевич, Захаров Ньургун Георгиевич. Дьүүллүүр сүбэҕэ үлэлээтилэр ХИФУ философия кафедратын доцена, философскай наука кандидата Винокуров Василий Васильевич, ХИФУ культурология кафедратын доцена, культурология наукатын кандидата Попов Николай Спиридонович, Олоӊхо Дьиэтин дириэктэрэ Иванова Евдокия Николаевна.

Түhүлгэҕэ сэттэ анал аат олохтоммута. «Сэhэн төрдүн тутар олоӊхоhут» аат Иванов С.А, «Олоӊхо тэтимин тутар олоӊхоhут» - Захаров Н.Г, «Дорҕоон тойуктаах олоӊхоhут» - Адамова В.И, «Кылыhах ырыалаах олоӊхоhут» - Петрова А.С., «Хомоҕой тыллаах олоӊхоhут» - Винокуров А.Н, «Удьуор утумун тутар олонхоhут» - Захаров А.А., «Кэскиллээх олоӊхоhут» - Михайлова Т.С.  иӊэриллэн Добун суруктар, анал бэлэх-туhах туттарылыннылар. Попова Г.С. – Санаайа истээччилэр ортолоруттан көрө-истэ сылдьан, бастыӊ олоӊхону истээччини быhааран, «Бастын Нооhут» диэн ааты улуустааҕы «Оhуохай» түмсүү салайааччытыгар Шипошина Мария Михайловна5а иӊэрдэ.  Бу икки күӊӊэ Шипошина М.М. толору сылдьан, оhуохайы тэрийэн дьон сүргэтин олус көтөхтө, кэлбит дьон дуоhуйа оhуохайдаатылар, араас улуустан сылдьар ыччаттарбыт оhуохайга маастар кылаас көрдөрдүлэр.

Иккис күӊӊэ «Куйуур олоӊхотун» кыттыылаахтара «Лүкээрики» күөлүгэр олохтоох нэhилиэк түөлбэлэрин икки ардыгар куйуурга күрэхтэhиини көрөн, сааскы салгынынан тыынан үөрдүлэр-көттүлэр, астыннылар. Күрэхтэhиини республикаҕа спортивнай куйууру олохтооhуӊӊа үлэлэспит, биллэр куйуурдьут Андреев Прокопий Константинович сиэрдээн-туомнаан салайан ыытта. Уопсай түмүккэ  «Кустук» түөлбэ эрэллээхтик бастаата (салайааччы – Игнатьева Е.Т.), саамай улахан балыгы Петрова Айталина Тарасовна таhаарда, минньигэс күөс, чэй оргутуута, эстафета, абсолютнай курдук көрүӊнэргэ эмиэ күрэхтэстилэр.

Олоӊхо түhүлгэтин уонна куйуур күрэхтэhиитин түмүгүн иhитиннэрии үөрүүлээх быhыыга-майгыга ыытылынна. Куйуурга бастаабыттарга ботуруон, атын да бэлэх-туhах туттарылынна. Биир дойдулаахпыт Кириллин Афанасий Павлович кэскиллээх, куйууру сайыннарыыга үтүөлэрдээх киhиэхэ диэн анаабыт бирииhэ – набор анньыы – республика чемпионугар Винокуров Леонид Дмитириевичка туттарылынна. Муус устар саӊатыгар ыытыллар республиканскай куйуурга күрэхтэhиигэ Лоомтукаттан 6 киhилээх команда тэриллэн бараары сылдьар. Лоомтукаҕа куйуур ыытыллар буолбута 30 сыл буолбут. Аны бу куйууру быйыл аан бастаан олоӊхону кытта ситимнээтибит. Сааскы куйуур кэмин олоӊхотун сөргүтүүгэ, үүнэр сүhүөх ыччат олоӊхо тыынын, өйүн, тылын-өhүн, ырыатын иӊэринэн саха көӊүл айыы киhитэ буола үүнэригэр олук уурдубут. 

Егорова Евдокия Павловна –

Тыыллыма орто оскуолатын учуутала