“Кини тус бэйэтин библиотекатыгар 7000 кинигэлээҕэ. Кинигэтин араас сиртэн сурутан, киин уобаластартан атыылаһан ылара, Москва кинигэтин маҕаһыыннарын атыылааччылара кинини билэллэрэ, сэргииллэрэ” - диэн кэллиэгэтэ Афанасий Петрович Илларионов истиҥник ахтан аҺарда.

Ахсынньы 9 күнүгэр Нөөрүктээйитээҕи “Экспресс” саҥа көлүөнэ библиотекаҕа РФ культуратын үтүөлээх үлэһитэ, РСФСР уонна ССРС үөрэҕириитин туйгуна, методист-учуутал, кинигэни таптааччы Иван Прокопьевич Игнатьев төрөөбүтэ 90 сылыгар анаан төгүрүк остуол ыытылынна. Төгүрүк остуолу киирии тылынан “Нөөрүктээйи” тыа сирин түөлбэтин баһылыга Федоров Н.Г. арыйда, библиотека сэбиэдиссэйэ Колосова Н.И. салайан ыытта.

Педагогическай үлэ ветераннара Татьяна Михайловна Ильина, Калисфена Дмитриевна Федорова үөрэппит учууталларын туһунан олус долгутуулаахтык кэпсээтилэр. Дьокуускай куораттан Любовь Семеновна Аргунова педагогическай үлэтин саҕалыырыгар И.П.Игнатьев Хаптаҕай оскуолатыгар завучтуу сылдьан методическай көмөнү эдэр учууталларга көдьүүстээхтик оҥорорун, ирдэбиллээҕин, учууталларга демократичнай сыһыаннааҕын туһунан аҕынна. Афанасий Петрович Илларионов Иван Прокопьевич оройуоннааҕы үөрэх салаатыгар инспекторынан, оройуоннааҕы методическэй кабинет сэбиэдиссэйинэн үлэлээбит кэмнэрин сырдатта.

Төгүрүк остуолга кыттыыны ылбыт И.М.Сосин аатынан Мэҥэ-Хаҥаластааҕы кииннэммит библиотечнай ситим дириэктэрэ Корнилова Е.С., Р.Г.Васильев аатынан улуустааҕы кыраайы үөрэтэр музей научнай үлэһитэ Эверстов А.В., улуустааҕы үөрэҕирии салалтатын информационнай-методическай салаатын начальнига Сидорова Т.В., оҕо библиотекатын сэбиэдиссэйэ Дьяконова О.Н., төрөппүт Сыроватская А.К., Павловскай орто оскуолатын дириэктэрэ Петров В.В., дириэктэри солбуйааччы Петрова С.Е., ветеран учуутал Бочкарева Г.В. уо.д.а. И.П.Игнатьевы дэгиттэр учуутал, методист, пропагандист, музеевед, кинигэни таптааччы, поэт, үтүө майгылаах доҕор, аҕа табаарыс, наставник быһыытынан сырдаттылар.

Төгүрүк остуол кыттыылаахтара Иван Прокопьевич Игнатьев сырдык аатын үйэтитии туһунан кэпсэттилэр, ыытыллыахтаах тэрээһиннэри былааннаатылар.

Сидорова Т.В., улуустааҕы үөрэҕирии салалтатын

информационнай-методическай салаатын начальнига