Бу күннэргэ Дьокуускайга «Сосновай бор» оҕо сынньанар уонна чэбдигирэр киинигэр «Агрофест» сменаҕа өрөспүүбүлүкэ 10 оройуонуттан үөрэнээччилэр түмсэн агробиисинэс хайысхалаах бырайыактары көмүскээтилэр.

Үөрэнээччилэрбит бастыҥ былааннарын олоххо киллэриигэ биир саастыылаахтарын кытта алтыһан элбэҕи биллилэр-көрдүлэр, атын бырайыактары билистилэр. Агрохайысханы, бэйэ бородууксуйатын оҥорон таһаарыыга, чөл туруктаах аһынан-үөлүнэн күннээҕи олохпутун хааччыйыыга санааларын ууран элбэх тэрээһиннэргэ кытыннылар.

Дмитрий Таас аатынан Хорообут агрооскуолатыттан 10-с кылаас үөрэнээччилэрэ Вика Иванова, Надя Птицына, Света Чугунова, Руфина Винокурова «Картофельные чипсы в сушилке для овощей: Здоровый перекус» биисинэс-бырайыактарын көмүскээтилэр. Итиэннэ «Агростартап» куонкуруһугар бастыҥынан ааттанан эдэр пиэрмэрдэр ааттарыттан 100 тыһыынча солкуобайдаах сэртипикээтинэн наҕараадаланар чиэстэннилэр.

Бырайыагы олоххо киллэриигэ дириэктэр Руфина, буҕаалтар Света, маркетолог Вика, пуобар-технолог Надя оруолун толордулар. Бырайыак салайааччыта, дириэктэри иитэр үлэҕэ сүбэһит Ангелина Сергучева. Оҕолорбутугар производственнай үөрэхтээһин маастара Мария Бугаева күүс-көмө буолла.

Үөрэнээччилэрбит баҕа санаалара туолла. Сайын устата оскуола таһыгар үүннэрбит оҕуруоттарын аһынан чипсы араас көрүҥүн оҥорон, биир саастыылаахтарын күндүлүөхтэрэ.