Муус устар 24 күнүгэр үгэскэ кубулуйбут Төӊүлүтээҕи «Олимпионик» оҕо сайдар киинигэр улуустааҕы “Хоhуун уол» байыаннай-спортивнай күрэх Республикабыт бэлиэ күнүгэр ананан үрдүк тэрээhиннээхтик буолан ааста.

Күрэх сүрүн сыала, уол оҕоҕо спортка интириэhи үөскэтии, уол быhыытынан байыаннай, париотическай тыыӊӊа, тулуурдаах, дьаныардаах, үлэни тиhэҕэр тириэрдэр үөрүйэхтэри иитии.

Улууспут 12 детсадын: Майа «Кэнчээри», “Сардаана”, Аллараа Бэстээх «Сказка», “Солнышко”, Тумул «Куоласчаан», Матта “Ньургуhун», Павловскай “Мичээр”, Балыктах «Звездочка», Дьабыыл “Кэскил”, Хара “Кэрэчээн”, Төхтүр “Мичил”, Төӊүлү «Олимпионик» кыайыыга дьулуурдаах уолаттара, ох курдук оӊостон, бэлэмнэнэн кэлэн 7 түһүмэххэ күөн көрүстүлэр.

Ол курдук: I түhүмэххэ «Будущий защитник» уолаттар «Герой Попов туһунан ырыаны” доргуччу толордулар, строевой бэлэмнэрин көрдөрдүлэр. II түhүмэххэ военизированнай эстафетаҕа уолаттар ким түргэнин, сымсатын судьуйалар бириэмэни көрөн быhаардылар. III түhүмэххэ Россия Армиятын историятын, байыаннай техникатын, войскаларын, Мэҥэ-Хаҥалас гербэтин, эр хоһууттарын төhө билбиттэрин билиэт тардан эппиэттээтилэр. IV түhүмэххэ |имигэс тарбах, булугас өй, быаны сүөрүүгэ көhүннэ. Маска тоhоҕону саайыы, хаптаhыны эрбээhин саамай тыӊааhыннаах түhүмэхтэринэн буоллулар. Түмүктүүр түhүмэххэ площадкаҕа тахсан гранатанан ырааҕы кыыратыыга күрэхтэстилэр.

Күрэхтэhии дьүүллүүр сүбэтинэн буоллулар: Николай Витальевич Романов – Мэҥэ-Хаҥалас улууһун үөрэҕириигэ салалтатын иитии үлэтин уонна эбии үөрэхтээһин отделын сүрүннүүр специалиһа, Василий Семенович Эверстов – Төңүлү орто оскуолатын физкультураҕа уонна байыаннай үөрэхтээhиҥҥэ үрдүкү категориялаах учуутала, ССРС спордун маастара, Руслан Русланович Сидоров – тыа хаhаайыстыбатын техникумун Төӊүлүтээҕи салаатын физкультураҕа учуутала.  

Түмүккэ:

• III миэстэни ылла Устинов Эрсан, Төӊүлү «Олимпионик» (сал. Попова Нь.С.),
• II миэстэ - Гоголев Виктор, Майа «Кэнчээри» (сал. Григорьева Д.В., Павлова А.В.)
• I миэстэ - Афанасьев Андрей, Майя «Сардаана» (сал. Попова С.А., Слепцова И.А.)
• Муҥутуур кыайыылаах «Хоhуун уол» үрдүк аатын ылан Лукин Дуолан, Хара «Кэрэчээн»» детсадын иитиллээччитэ буолла (сал. Макаров И.И.). Бэлиэтээн эттэххэ Хара детсадын физкультураҕа инструктора Иван Исаевич Макаров үрдүк таһымнаах бэлэмнэниини көрдөрөн, быйыл үһүс сылын муҥутуур Кыайыылааҕынан буоллулар.

Кыттааччылар бары туоһу сурук, анал аат, грамотанан наҕараадаланан, өйдөбүнньүк бэлэх тутан, үөрэн-көтөн тарҕастылар.