Бүгүн, сэтинньи 21 күнүгэр, Харатааҕы оҕону сайыннарар «Кэрэчээн» киин 50 сыллаах үбүлүөйдээх тэрээһинэ ыытылынна.

Үйэ аҥаардаах кэм устата ааспыт үлэ түмүгүн бэлиэтиир үбүлүөйдээх тэрээһини уһуйаан сэбиэдиссэйэ Анна Киренская арыйда.

Кэрэ-бэлиэ күҥҥэ Хара нэһилиэгин баһылыга Дария Назарова, улуус баһылыгын бастакы солбуйааччы Гаврил Толстяков, улуус үөрэҕирии салалтатын салайааччыта Ирина Плотникова, улууска үөрэх үлэһиттэрин идэлээх союһун бэрэссэдээтэлэ Иннокентий Скрябин, улуус култуура уонна духуобунай сайдыытын салалтатын начаалынньыгын солбуйааччы Александр Кулешов, Харатааҕы «Айыллаан» култуура киинин уус-уран салайааччыта Татьяна Степанова уһуйаан бары үлэһиттэрин, бэтэрээннэрин үбүлүөйдээх тэрээһининэн эҕэрдэлээтилэр, наҕараадаларын туттардылар.

Бу үөрүүлээх күҥҥэ «Кэрэчээн» хор толоруутугар, Мусьяна Сосина тылларыгар, Капитолина Семенова дьүрүлүгэр уһуйаан өрөгөй ырыатын сүрэхтэниитэ биир бэлиэ түгэнинэн буолла.

Уһуйаан үлэһиттэригэр, иитээччилэригэр оҕо кэскилин туһугар күннэтэ ыытар үтүө суобастаах үлэҕитигэр, кыһамньыгытыгар, уҕараабат тапталгытыгар истиҥник махтанабыт! Өссө да элбэх оҕону иитэн, үөрэтэн, дьоллоох оҕо сааһы бэлэхтииргитигэр баҕарабыт!