Бүгүн, сэтинньи 19 күнүгэр Хара нэһилиэгэр Харатааҕы “Кэрэчээн” детсад тэриллибитэ 50 сылыгар аналлаах “Айымньылаахтык үлэлиибит, дьоллоохтук иитэбит” диэн педагогтар творческай отчуоттара буолан ааста.

Бу күн бастакы аҥарыгар араас эти – хааны эрчийиигэ, билии көрүү, тыл сайдыытыгар аһаҕас дьарыктар аастылар. Ону таһынан үлэһиттэр бэйэлэрэ илиилэринэн оҥорбут оҥоһуктарынан “Айар дьоҕурбут абылаҥа” диэн выставка турда.

Творческай отчет арыллыытыгар Мэҥэ – Хаҥалас улууһун үөрэҕин салалтатын салайааччытын солбуйааччыта Филипп Александрович Стручков эҕэрдэ тылын, баҕа санаатын эттэ. Детсад иитиллээччилэрэ эҕэрдэ нүөмэрдэринэн киэргэттилэр.

Күн иккис аҥарыгар араас тиэмэлэргэ педагогтарга аналлаах маастар кылаастар аастылар. Иитэччи Светлана Григорьевна Никитина оҕолорго аналлаах “Тарбахтары хамсатар хоһоон холбуката” кинигэтин билиһиннэрдэ.

Кэлбит ыалдьыттар бары эҕэрдэ тыл этэн, махтанан күннэрин туһалаахтык атаарбыттарыттан астынан тарҕастылар.