Тохсунньу 27 күнүгэр Хара орто оскуолатын олоҕор биир улахан, умнуллубат бэлиэ күн - "Дьоруой Паартатын" арыллыыта буолан ааста.

Дойдубут "Биир Ньыгыл Арассыыйа" партиятын көҕүлээһининэн "Дьоруой Паартата" үөрэхтээһин бырайыак 2018 сылтан олоххо киирбитэ. Үөрэнээччилэр остуолларыгар хорсун уолаттарбыт хаартыскалара, кинилэр биографиялара, чахчылара түмүлүннэ.

Бырайыак сыала – соруга үөрэнээччилэргэ биир дойдулаахтарын-Дьоруойдарын килбиэннээх, тус хорсун быһыыларын санатыы, кинилэр сырдык ааттарын үйэтитии буолар.

Биһиги оскуолабытыгар "Дьоруой Паартата" ананна – оскуолабыт выпускнигар Семен Марковка уонна нэһилиэкпит олохтоохторугар Иван Захаровка, Жирков-Антонов Василийга, Сергей Шишигиҥҥа.

Семен Марков (Маркиз) – Хара спортивнай лицейыгар 1999 сыллаахха маҥнайгы кылааска үөрэнэ киирбитэ. Үөрэнэр кэмнэригэр көҥүл тустуунан дьарыктаммыта. Саха Өрөспүүбүлүкэтин инникигэ хардыы научнай кэмпириэнсийэлэргэ ситиһиилээхтик кыттара. 2009сыллаахха оскуолатын бүтэрэн М.К Аммосов аатынан Дьокуускайдааҕы Судаарыстыбаннай Университетка Геолого-разведочнай факультетка туттарсан үөрэнэ киирэр. 2012 сыллаахха Хабаровскай куоракка Тимир Суолун чааһыгар Российскай Армия кэккэтигэр сулууспалаабыта.Сулууспалаан кэлэн Алдан куоракка договорынан Ваахтаҕа үлэлээбитэ. Төрөөбүт нэһилиэгин олус таптыыра, ыччаттар бөлөхтөрүн актыыбынай кыттыылааҕа. Култуура уонна спорт эстэпиэтэтин, нэһилиэккэ ыытыллар спортивнай күрэхтэргэ солбуллубат кыттааччыта. Доҕотторун кинини олус өйүүллэрэ, убаастыыллара. Нэһилиэкпитигэр биир бастыкынан Балаҕан ыйын 24 күнүгэр, 2022сыллаахха Анал Байыаннай Дьайыыга быстах хомуурга бэбиэскэ туппута уонна төрөөбүт дойдум ыҥырар буоллаҕына мин барабын хорсуннук айаҥҥа турбута. Семен Марков (Маркиз) анал байыаннай дьайыы бэтэрээнэ, «ЭР САНААЛАНЫЫ» уордьана анаммыта.

Иван Захаров (Турист) – 1987 сыллаахха алтынньы 23 күнүгэр Павловскай бөһүөлэгэр Мария Ивановна, Иван Иванович Захаровтар дьиэ кэргэнигэр онус оҕонон күн сирин көрбүтэ. Павловскайга детсакка сылдьыбыта. Алын кылаастарга Павловскай орто оскуолатыгар үөрэммитэ, онтон орто сүһүөххэ 2 Дьөппөн интернат оскуолатыгар үөрэммитэ. 9-с кылааһы Чүүйэ орто оскуолатыгар, 10-11-с кылаастары Майа киэһээҥҥи оскуолатыгар түмүктээбитэ. Дьокуускайга Тыа хаһаайыстыбатын техникумугар землеустроитель үөрэҕэр киирэн баран түмүктээбэтэҕэ. Майатааҕы гуманитарнай оскуолаҕа оробуочайынан, кэлин ИВТ технигынан өр сылларга үлэлээбитэ. Аҕатын туйаҕын хатаран техникаҕа үчүгэй сыһыаннаах этэ, көрөн-истэн, сууйа-сото сылдьара. Ол курдук, Андреев Прокопий Прокопьевичка тырахтарыыһынан, Дьокуускай куоракка аймахтарыгар Федор, Яков Арчаховтар чааһынай тэрилтэлэригэр суоппарынан, кылгас кэмнэ Майатааҕы суолу онорор тэрилтэҕэ үлэлээбитэ. 2022 сыллаахха балаҕан ыйын 22 күнүгэр бэйэтин баҕатынан Быстах байыаннай дьайыыга суруйтаран барбыта. 2023 сыллаахха сэтинньи ыйга отпускаҕа кэлэн аймахтарын, чугас дьонун, табаарыстарын көрсөн барбыта. Хара нэһилиэгин олохтооҕо, Анал байыаннай дьайыы бэтэрээнэ, «ЭР САНААЛАНЫЫ» уордьан анаммыта.

Жирков-Антонов Василий (Бөрө) - Төрөөбүтүнэн Жирков Василий Павлович, Майаттан төрүттээх. Атырдьах ыйын 4 күнүгэр, 1981 сыллаахха, күн сирин көрбүтэ. 1997 сыллаахха оскуоланы бутэрээт маһынан кыһыы үөрэҕин бүтэрбитэ. Пандемия буолуор дылы улуустааҕы оҕо приютугар бэйэтэ ис сүрэҕиттэн көмөлөһөн улууска "Сыл бастыҥа", өрөспүүбүлүкэттэн махталсурук, "Амарах сүрэх" анал аат, өрөспүүбүлүкэтээҕи Аҕа сүбэтин Почетнайграмотатын, "За вклад в развитие волонтерства" бэлиэни ылбыта. "Үтүө санаа" Арассыыйатааҕы конкурска номинаннаабыттара. Дойдубут уустук кэмигэр 2024 сыл сэтинньи 11 күнүттэн, баҕа өттүнэн анал байыаннай дьайыыга хантыраак түһэрсэн сулууспалыы барбыта. Бойобуой сорудахтарын эҥкилэ суох толоронбииргэ сулууспалыыр табаарыстарынубаастабылын ылбыта. Анал Байыаннай дьайыы бэтэрээнэ, «ЭР САНААЛАНЫЫ» уордьан анаммыта.

Шишигин Сергей (Никон) – 2002 сыл олунньу 20 күнүгэр Дьокуускай куоракка күн сирин көрбүтэ. 2008 сыллаахха сибэкки дьөрбөтө тутуурдаах кыракый уолчаан куорат 30 нүөмэрдээх оскуолатыгар маҥнайгы кылааска киирэр. Начальнай кылааһы бүтэрээт ийэтинээн ыраах Өлөөн улууһугар бараллар. Мини-футболунан дьарыктанара бастаан Өлөөн хамаандатыгар оонньоон хотугу улуустар икки ардыларыгар хас да төгүллээх призера, чемпиона. Онтон кэлин сылларга Мэнэ Ханаластааҕы Ломтука спортивнай оскуолатыгар бэйэтэ баҕатынан үөрэнэ барар, онно футболунан өссө күүскэ дьарыктанар уонна Саха Сирин сборнай хамаандатыгар отборданан табаарыстыы матчка Япония курдук сиргэ барар чиэскэ тиксэр. Арааһынай күрэхтэһиилэргэ кытталлар. Ломтука оскуолатын бүтэрэн да баран Мэҥэ Хаҥалас эдэр ыччат хамаандатыгар өрүү оонньуура, «Манчаары» футбольнай кулууп састаабыгар тутаах оонньооччу этэ. Байыаннай дьайыы саҕаламмытыгар бэйэтин баҕатынан муус устар 1 күнүгэр 2024 сыллаахха контракт баттаһар, патриот санаата баһыйар. 656 мотострелковай полк, 1 штурмовой взвод замкомандира буолар, «Никон» диэн позывнойданар. Анал байыаннай дьайыы бэтэрээнэ, «ЭР САНААЛАНЫЫ» уордьан анаммыта.

Бу тэрээһиммитигэр Арассыыйа Дьоруойа Андрей Николаевич Григорьев – Тута, Арассыыйа Дьоруойа Алексей Рафаэлович Петров – Медведь, анал Байыаннай дьайыыттан уоппускаҕа кэлэ сылдьар Игорь Вячеславович Егоров, Петр Семенович Антонов, биир дойдулаахпыт, Анал Байыаннай дьайыы волонтера, Елена Васильевна Лебедкина ыалдьыттаатылар. Оскуолабыт үөрэнээччилэрин кытары хорсун быһыы, сиэрдээх буолуу, төрөөбүт дойдуга бэринии туһунан кэпсэтиһии буолла. Үөрэнээччилэр Дьоруойдартан интириэһиргиир боппуруостарын ыйыттылар.

Хорсун -хоодуот быһыыларынан норуот киэҥ туттуутун ылбыт, Ийэ дойдуга бэриниилээх буолуу холобурун көрдөрбүт Дьоруойдарбытыгар дириҥ ытыктабылбытын биллэрэбит.