Бүгүн, ахсынньы 6 күнүгэр, Гражданскай сэрии Дьоруойа Кеша Алексеев аатынан Хаптаҕай орто оскуолата 125 сыллаах үбүлүөйдээх тэрээһинэ ыытылынна.

Устуоруйаттан быһа тардан билиһиннэрдэххэ, Саха АССР Үрдүкү Сэбиэтин Президиумун 1947 сыл бэс ыйын 26 күнүнээҕи "Саха сиригэр Гражданскай сэрии уһулуччулаах кыттааччыларын ааттарын үйэтитии" ыйааҕынан Иннокентий Егорович Алексеев аата Хаптаҕай сэттэ кылаастаах оскуолатыгар иҥэриллибитэ.

Күн бүгүн оскуола дириэктэринэн Кычкина Ирина Владимировна таһаарылаахтык үлэлии-хамсыы сылдьар.

Дьоро күнүнэн улуус баһылыга Дмитрий Иванович Тихонов, норуот дьокутаата Андрей Михайлович Находкин, нэһилиэк баһылыга Иван Прокопьевич Зыков, Саха Өрөспүүбүлүкэтин үөрэҕириитин миниистирин солбуйааччы Ньургун Михайлович Павлов, “Ытык сүбэ” өрөспүүбүлүкэтээҕи кырдьаҕастар үрдүкү Сэбиэтин бэрэссэдээтэлэ, Мэҥэ Хаҥалас улууһун, Хаптаҕай, Нөөрүктээйи нэһилиэктэрин Бочуоттаах олохтооҕо, Хаптаҕай оскуолатын выпускнига Люлия Николаевна Григорьева, Саха Өрөспүүбүлүкэтин агро оскуолалар сойуустарын салайааччыта Петр Гаврильевич Дягилев, улууска үөрэх салалтатын начаалынньыга Ирина Михайловна Плотникова, үөрэх үлэһиттэрин профсоюһун бэрэссэдээтэлэ Иннокентий Михайлович Скрябин истиҥ эҕэрдэлэрин тиэртилэр, үлэҕэ-хамнаска ситиһиилэри бэлиэтээн наҕараадаларын туттардылар.

Ытыктабыллаах Ирина Владимировна, кэлэктиип! Айымньылаах үлэҕит үрдүк ситиһиилэри аҕаллын, махталлаах үөрэнээччилэри, төрөппүттэри, чэгиэн доруобуйаны, этэҥҥэ буолууну баҕарабыт!