Алтынньы 27 күнүгэр улуус үөрэҕириигэ салалтатын начальнига Николай Лукич Никифоров Өрөспүүбүлүкэ киинигэр Дьокуускай куоракка үлэ бэрээдэгинэн кэккэ көрсүһүүлэргэ сырытта. Ол курдук, Дьокуускайдааҕы медецинскай колледж директорын Алексеев Дмитрий Афанасьевичтыын күн бастакы аҥарыгар көрсөн, улуус Аҕа баһылыга Дмитрий Иванович Тихонов көҕүлээһининэн колледж филиалын улууспутугар тэрийии тула кэскиллээх кэпсэтии буолла. Кэпсэтии түмүгүнэн, Дмитрий Афанасьевич туруоруммут сыал-сорук суолталааҕын бэлиэтээтэ уонна колледж улуус оҕолорун араас таһымнаах куонкурустарга, ааҕыыларга, күрэстэргэ бэлэмнииргэ күүс-көмө буоларга бэлэмин биллэрдэ.

М.К. Аммосов аатынан Хотугулуу илин Федеральнай университет Медицинскай институт директорын Николай Михайлович Гоголевы, институт иһинэн үлэлиир Малай медицинскай академия салайааччытын Малогулова Ирина Шамильевналыын көрсөн, улууспутугар академия филиалын тэрийиигэ сөбүлэҥ баттаһыыта буолла. Институт уонна академия салалтата бүгүҥҥү күҥҥэ тустаах кадр тиийбэтин бэлиэтээн, инники сылларга боппуруоһу табыгастаахтык быһаарарга көрүүлэрин үллэһиннилэр. Ол курдук, академия филиалын тэрийэн оҕолор профессиональнай хайысхаларын быһааран, быраас идэтин баһылыан баҕалаахтарга анал программанан үөрэнэн, талбыт идэлэринэн туһааннаах үөрэххэ туттарсалларын ситиһии сыалын, соруктарын чопчу туруоран ситиһэргэ былааннаах үлэ ирдэнэрин бэлиэтээтилэр.

Мэҥэ Хаҥалас улууһугар, анал быраас идэлээх бэйэбит ыччаппыт үүнэн-сайдан тахсан, олохтоох нэһилиэнньэ бигэ туруктаах, чөл, доруобай, олорор улуустарыттан ырааппакка хаачыстыбалаах мэдиссиинэ өҥөтүнэн туһанар буолуулара кэрэхсэбиллээх. Онно туһуламмыт үлэ хайысхата кэскиллээх, үтүө түмүктэрдээх буоларын ситиһэр олук уурулунна.