Ахсынньы 15 күнүгэр “Кэрэли” улуустааҕы оҕону эбии үөрэхтээһин киин Майаҕа уонна нэһилиэк филиалларыгар үлэлиир педагогтарыгар, төрөппүттэригэр анаан сүбэ-мунньах тэрийдэ.

Төрөппүттэргэ анаан киин педагогтара маастар-кылаастары ыыттылар. Ол курдук «Мягкая игрушка», «Чудеса из полимерной глины» куруһуок салайааччыта Мария Ефимова “полимернай глина” матырыйаалтан брошь-харыйа оҥоттордо. Бу маастар-кылааска 9 төрөппүт кытынна. 7 төрөппүт “Блеск” куруһуокка Евдокия Захарова салалтатынан “ороһуоспатааҕы венок” оҥордулар. Педагогтар Татьяна Яковлева тааска витраж ньыматынан саҥа дьыллааҕы открытканы, Лия Бубякина браслеттары, Алина Нестерова хаһыаттан харыйалары, Дария Птицына “айрисфолдинг” ньыманан паннолары оҥоттордулар.

Тэрээһин иккис чааһыгар “Кэрэли” киинин дириэктэрэ Марианна Билюкина уонна дириэктэри үөрэх чааһыгар солбуйааччы Лина Маркова, педагог-тэрийээччи Ирина Борисова, Марианна Монастырева киин үлэтин билиһиннэрэн кэпсээтилэр. Ол кэннэ төрөппүт сүбэтин таллылар. Төрөппүт сүбэтин бэрээссэдээтэлинэн Майатааҕы үөрэтэр-оҥорон таһаарар киин педагогун Татьяна Маркованы төрөппүттэр биир санаанан таллылар. Сүбэ-мунньах кэнниттэн дьиэ кэргэн сайдар тутулун үөрэтээччи, психолог Нина Слободчикова уонна Матта нэһилиэгиттэн суруналыыс идэлээх, психолог, эдэр ийэ Вероника Александрова-Эрэлкээнэ ыалдьыттаан туһааннаах лиэксийэлэри, сүбэ-ама биэрдилэр. Кыттыбыт төрөппүттэр астынан-дуоһуйан, тустарыгар туһанан, үгүһү билэн-көрөн бардылар.

Зоя Герасимова.