Эһигини барыгытын тапталлаах улууспут, Мэҥэ Хаҥаласпыт, төрүттэммит күнүнэн ис сүрэхпиттэн эҕэрдэлиибин!

1930 сыллаахха Саха АССР Ситэриилээх кэмитиэтин уонна норуодунай президиумун 4347 нүөмэрдээх "Оройуоннар састааптарын уларытыы" уураахтарыгар олоҕуран, Мэҥэ уонна Илин Хаҥалас оройуоннарын холбоон, Мэҥэ Хаҥалас улууһа 1930 сыллаахха олунньу 10 күнүгэр тэриллибитэ.

Бу кэмтэн элбэх сыл-хонук  ааста, үгүс үтүө, үлэһит дьон төрөөн-үөскээн, улууспут сайдыытыгар олохторун анаабыттарын умнубаппыт, кинилэр холобурдарыгар үүнэр көлүөнэни иитэбит.

Хайдахтаах да уустук түгэҥҥэ Саха омук ырааҕы көрөрүнэн, ыччаттарын иннигэр эппиэтинэһи тумус тутан, түмсэн, баар моһоллору этэҥҥэ ааһан баччаҕа кэллэхпит.

Үгэстэрбитин тутуһан, күн бүгүн, дьоммут-сэргэбит, дойдубут туһугар биир санаанан үлэлии-хамсыы сылдьар дьоммор, сүбэ-ама буолар ытык аҕам саастаахтарбар, сарсыҥҥыга эрэллээх, эрэнэр ыччат дьоммор  махтал тылларбын тириэрдэбин.

Улууспутугар үс сыллаах Тыа хаһаайыстыбатын сылларын таһаарыылаахтык ыытан, аны 2026-2028 сыллары Олохтоох оҥорон таһаарыы сылларынан биллэрэммит үтүө түмүктээх буоларын түмсүүлээх үлэбитинэн ситиһэрбитигэр эрэнэбин.

Күндү бар дьоммор баҕарабын чэгиэн-чэбдик туругу, дьолу-соргуну, үөрэххэ-үлэҕэ ситиһиилэри, этэҥҥэ буолууну, эйэлээх халлааны!

ҮҮНЭ, САЙДА ТУР, ТАПТАЛЛААХ ДОЙДУБУТ-  МЭҤЭ ХАҤАЛАС!