Күндү биир идэлээхтэрбит - күн күбэй ийэлэр!

Эһигини Саха Өрөспүүбүлүкэтигэр бэлиэтэнэр Ийэ күнүнэн итиитик- истиҥник эҕэрдэлиибит! Быйылгы бырааһынньык ураты быһыыга-майгыга ыытыллар - Саха сирин автономиятын 100 сылынан 2022 сыл өрөспүүбүлүкэбитигэр Ийэ сылынан биллэриллибитэ. Устуоруйа ханнык баҕарар кэрчик кэмнэригэр ийэ уопсастыба тутаах киһитэ буолар. Кини тулуура, дьулуура, олоххо тардыһыыта, төрөөбүт дойдуга, оҕоҕо таптала, муудараһа-уопсастыбаны хамсатар күүс.

Дьиэ-кэргэн саамай күндү баайа - оҕото доруобай, үөрэхтээх, сайдыылаах киһи буоларыгар үөрэхтээһин тэрилтэлэрэ күннэтэ кыһаллан үлэлииллэр- хамсыыллар. Иитээччилэр, учууталлар хас биирдии оҕоҕо ийэлии тапталынан сыһыаннаһаллар, кинилэргэ билиилэрин-көрүүлэрин, уопуттарын  туһаайаллар. Уһуйааннар, оскуолалар ыраас-сырдык буолалларыгар, оҕолор күннэтэ минньигэстик аһыылларыгар эмиэ ыал ийэлэрэ төрөппүт оҕолоругар курдук кыһаллаллар.

   Бүгүҥҥү үөрүүлээх күҥҥэ биир идэлээхтэрбитигэр- ийэлэргэ баҕарабыт сир үрдүгэр баар бары кэрэни, үчүгэйи,  ыраас халлааны, күлүмнүүр күнү! Оҕолор тустарыгар ахсаабат кыһамньыгыт, сылаас тапталгыт, муударай сүбэҕит иһин барҕа махтал, уруй-айхал буоллун!

Улуустааҕы үөрэҕирии салалтатын начальнига

Н.Л.Никифоров

Профсоюз улуустааҕы тэрилтэтин председателэ

И.М.Скрябин