Кулун тутар 5 күнүгэр Өлүөнэ эбэ илин эҥээригэр сытар анал оскуола үөрэнээччилэрин 18-с Спартакиадата буолан ааста. Бу спортивнай тэрээһини 2006 сыллаахха аан бастакытын Таатта улууһун Тыараһа анал коррекционнай оскуолата иилээн-саҕалаан тэрийэн ыыппыта. Ол кэмтэн тиһигин быспакка сылын ахсын көһө сылдьан ыытыллар.

Быйылгы спартакиадаҕа үгэс курдук Тыараһа (Таатта), Амма (Амма улууһа), Орто-Эбэ (Уус-Алдан), Өлөчөй (Мэҥэ-Хаҥалас) анал коррекционнай оскуолатын сүүмэрдэммит хамаандалара түмүстүлэр. Үөрэнээччилэр барыта сэттэ көрүҥҥэ чэпчэки атлетикаҕа, остуол тенниһигэр, мас рестлиҥҥа, остуол оонньуутугар (хабылык, хаамыска), хомуур күрэххэ, ох сааҕа, мини-футболга илин-кэлин түһүстүлэр.

Хамаандалар күн бастакы аҥарыгар мини-футболтан ураты бары көрүҥҥэ күрэхтэстилэр. Спортивнай саала оргуйан олордо, хотторуу кыһыыта-абата, кыайыы үөрүүтэ-көтүүтэ барыта баар буолла. Оҕолор бары көрүҥнэргэ бэрт сытыы киирсиини көрдөрдүлэр.

Күн иккис аҥарыгар Спартакиаданы үөрүүлээхтик арыйыы тэрээһинэ буолла. Күрэх аһыллыытыгар анал оскуола үөрэнээччилэрин хамаандалара парадтаан киирдилэр. Ол кэннэ капитаннар XVIII Спартакиада былааҕын күөрэччи таһаардылар. Тэрээһин кыттыылаахтарыгар кылаабынай судьуйа Барабанов С.С., оскуола директорын эбээһинэһин толорооччу Матчитова И.Е., Алтан нэһилиэгин баһылыгын солбуйааччы Романова Л.С. баҕа санаа бастыҥын эттилэр. Хас биирдии хамаанда эҕэрдэ нүөмэр көрдөрдө.

Салгыы күрэхтэһээччилэр мини-футболга күөн көрүстүлэр. Бу көрүҥҥэ 3 хамаанда кииристэ. Уопсай түмүккэ Орто-Эбэ үөрэнээччилэрэ Өлөчөй, Амма хамаандатын баһыйан кылбар кыайыыны ситистилэр. Иккис миэстэҕэ - Өлөчөй, үһүс миэстэҕэ - Амма хамаандалара таҕыстылар.

Биирдиилээн көрүҥҥэ анал оскуола хамаандаларын түмүгүн билиһиннэрдэххэ: чэпчэки атлетикаҕа 1 м. - Өлөчөй, 2 м. - Амма, 3 м. – Орто - Эбэ, 4 м. - Тыараһа; остуол тенниһигэр 1 м. - Өлөчөй, 2 м. - Амма, 3 м. - Орто-Эбэ, 4 м. - Тыараһа; мас реслиҥҥэ 1 м. - Өлөчөй, 2 м. – Амма, 3 м. - Орто-Эбэ, 4 м. - Тыараһа; остуол оонньуутугар (хабылык, хаамыска) 1м. - Өлөчөй, 2 м. - Орто-Эбэ, 3 м. - Тыараһа, 4 м. - Амма; хомуур күрэҕэр 1 м. - Амма, 2 м. - Тыараһа, 3 м. - Өлөчөй, 4 м. - Орто-Эбэ; ох саа5а 1 м.-Орто-Эбэ, 2 м. - Тыараһа, 3 м. - Амма, 4 м. - Өлөчөй; мини - футболга 1 м. - Орто-Эбэ, 2 м. - Өлөчөй, 3 м - Амма, 4 м. - Тыараһа.

Тыҥааһыннаах күрэхтэһии уопсай түмүгүнэн бастакы миэстэни Өлөчөйдөөҕү анал коррекционнай оскуола ситиһэн көһө сылдьар кубогынан наҕараадаланна. Иккис миэстэҕэ - Орто-Эбэ, үһүс миэстэҕэ - Амма, төрдүс миэстэҕэ - Тыараһа анал коррекционнай оскуолатын хамаандалара таҕыстылар.

Спартакиада түмүктэнэр чааһыгар хамаандаларга, үөрэнээччилэргэ сыаналаах бирииһи, анал грамотаны, мэтээли туттарыы буолла. Тириэнэрдэр махтал суруктарынан бэлиэтэннилэр.

Эһиилги XIX Спартакиада Уус-Алдан улууһун Орто-Эбэ анал коррекционнай оскуолатыгар ыытыллара быһаарылынна.