Муус устар 4-5 күннэригэр Уус Алдан улууһун Лөгөй нэһилиэгэр кэккэ предметтэри дириҥэтэн үөрэтэр Лөгөй орто оскуолатын базатыгар "Молодой педагог Заречья" диэн ааттаах эдэр учууталлар күрэхтэрэ буолан ааста.

Ол курдук бу күрэххэ 6 улуустан (Амма, Мэҥэ-Хаҥалас, Таатта, Уус-Алдан, Уус-Майа, Чурапчы) барыта 13 учуутал кэлэн кыттыыны ыллылар. Күрэҕи ИРОиПК экспертэрэ, ону таһынан улуустартан представителлэр сыаналаатылар.

Уопсайа 13 кыттааччы 19 эксперт иннигэр бэйэлэрин билиилэрин, сатабылларын, методическай таһымнарын көрдөрдүлэр, араас предметнэй хайысхаларынан кыайыылаахтар быһаарылыннылар.

Уопсайа 4 предметнэй цикл үлэлээтэ. Бастакы күҥҥэ семинардары, аһаҕас уруоктары көрдөрдүлэр, анал бырайыактарын көмүскээтилэр. Иккис күҥҥэ маастар кылаастар, төгүрүк остуоллар уонна педсовет ыытылыннылар.

Бу улахан тэрээһин эдэр учууталларга бастакы үктэл, төһүү күүс, улахан уопут ылыныыта буолара саарбаҕа суох. Манна хас биирдии кыттааччы элбэҕи билэр-көрөр, үүнэр сайдар. Маны сэргэ бу күрэх Илин Эҥэр оскуолаларын үлэлэрин уопута тарҕанарыгар төһүү күүс буолар. Быйылгы күрэх Лөгөй оскуолатыгар ыытыллыыта мээнэҕэ буолбатах. Ол курдук 2022 сыллаах күрэх кыайыылааҕынан Лөгөй орто оскуолатын историяҕа уонна обществознаниеҕа учуутала В.В. Бережнев буолбута.

Биhиги улууспутуттан бу күрэххэ кытыннылар: Варламов Лев Данилович – Харатааҕы И.Г. Игнатьев аатынан спортивнай оскуола саха тылын уонна литературатын учуутала, Попова Анжелика Ивановна – Майатааҕы И.Г. Тимофеев аатынан лицей математика учуутала, Шестакова Лена Егоровна – Хорообуттааҕы Дмитрий Таас аатынан оскуолатын биология, химия учуутала.

Күрэх түмүгүнэн муҥутуур кыайыылааҕынан Чурапчы улууhун Д.Г. Барашков аатынан  Бахсы орто оскуолатын историяҕа уонна обществознаниеҕа учуутала Попова Т.П. буолла. Биhигиттэн Попова А.И. естественнэй уонна политехническай цикл кыайыылааҕынан буолла. Варламов Л.Д. уонна Шестакова Л.Е. анал ааттар хаhаайыннарынан буоллулар. Эhиилги «Эдэр педагог» күөн күрэс быйылгы күрэх кыайыылааҕын оскуолатыгар Чурапчы улууhун Бахсы орто оскуолатыгар ыытыллыаҕа.  

Бакычаров А.Н., үөрэҕирии салалтатын педагог-организатора