Ахсынньы 20-21 күннэригэр Марфа уонна Сергей Расторгуевтар ааттарынан Саха государственнай циркэтигэр республикабыт араас улуустарыттан үрдүк ситиһиилээх, туйгун үөрэхтээх оҕолор талыллан Ил Дархан Харыйатыгар муһуннулар.

Мэҥэ Хаҥалас улууһуттан уопсайа 38 бастыҥтан-бастыҥ үөрэнээччилэр кыттыыны ыллылар: 32 оҕо улууска кэлбит квотанан сүрүн, орто уопсай үөрэхтээһин оскуолаларыттан талыллан киирдилэр, Владимир Петрович Ларионов аатынан Майа орто оскуолатытын 9 кылааһын үөрэнээччитэ Максим Семенов VIII төгүлүн ыытыллыбыт “Азия оҕолоро” норуоттар икки ардыларынааҕы спортивнай оонньуулар рекордсмена (атах оонньуутугар) Саха Өрөспүүбүлүкэтин оҕолорго “Спортка 10 бастыҥнар” истэригэр киирэн, 11 кылааһын туйгун үөрэнээччитэ Мотрена Назарова, Өрөспүүбүлүкэ саха литературатын олимпиадатын муҥутуур кыайыылааҕа, 11 кылааһын үөрэнээччитэ Аурика Тимофеева, “Саха сирин ааттара” Өрөспүүбүлүкэтээҕи эдэр музыканнарын күрэҕин лауреата, Иван Гаврильевич Тимофеев аатынан Майатааҕы лицей 11 кылааһын үөрэнээччитэ Вячеслав Назаров, Россия «Молодежь. Наука. Творчество» научно-практическай конференция призера тус ыҥырыы тутан кыттыыны ыллылар, ону таһынан Иван Иванович Платонов аатынан Наахара орто оскуолатын 9 кылааһын үөрэнээччитэ Тимир Луковцев, VIII төгүлүн ыытыллыбыт “Азия оҕолоро” норуоттар икки ардыларынааҕы оонньуулар мас тардыһыыга чемпиона, сылын ахсын ыытыллар Ил Дархан этиитинэн ыҥырыы тутан Харыйа бочуоттаах ыалдьыта буолла, Майатааҕы лицей 11 кылааһын үөрэнээччитэ Сайыына Дьячковская, бастыҥ медиа-корреспондент, Николай Егорович Мординов-Амма Аччыгыйын аатынан “Кэскил” оҕо издательствотын ыҥырыытынан кыттыыны ылла.

Оҕолору Владимир Петрович Ларионов аатынан Майа орто оскуолатытын педагог-организатора Анисимова Анна Степановна, Гаврильевич Тимофеев аатынан Майатааҕы лицей педагог-организатора Сергеева Милена Егоровна икки күн устата иилээн-саҕалаан илдьэ сырыттылар.

Икки күн устата араас тэрээһиннэр ыытылыннылар. Оҕолорго стипендиат буолалларын туоһулуур түөскэ кэтиллэр значоктары туттардылар, харчынан бириэмийэ ыллылар.