Күндү күн-күбэй ийэлэр!

Эһигини кулун тутар 1-21 күннэригэр Мэҥэ Хаҥалас улууһугар төрөөбүт тылы харыстыырга туһуламмыт алын кылаас үөрэнээччитэ ийэтиниин кыттар “Ийэбиниин сахалыы ааҕабын” марафоҥҥа кыттаргытыгар ыҥырабыт! Кыттааччыларга оскуола педагог-библиотекардара кураатардаан сүбэлээн, көмөлөһөн биэрэргэ бэлэмнэр. Марафон кыттыылаахтара олунньу 14-24 күннэригэр оскуола библиотекатыгар регистрацияланаллар, сорудахтардаах эркин халандаарын, ааҕааччы күннүгүн барылын туталлар.

Марафон кулун тутар 1 күнүгэр саҕаланыаҕа. Кыттааччыларга “АЙАР” кинигэ кыһата таһаарбыт алын кылаас оҕотугар сөптөөх билиҥҥи кэмҥэ атыыга баар кинигэ испииһэгэ бэриллэр. Маны таһынан сахалыы уус-уран ханнык баҕарар кинигэни ааҕаллара хааччахтаммат. Марафон “Саха тылын быһаарыылаах улахан тылдьытын” электроннай варианын туттар үөрүйэҕи тэнитиэ. https://igi.ysn.ru/btsja

Марафон кыттыылаахтара бука бары кулун тутар 27 күнүгэр Д.Ф. Ходуулап аатынан култуура киинигэр үөрүүлээх тэрээһиҥҥэ ААҔЫЫ АЛЫПТААХ ДОЙДУТУГАР ЫАЛДЬЫТТЫЫ ыҥырыллыахтара, бастыҥнары чиэстээһин тэриллиэҕэ. Бары кыттааччылар өйдөбүнньүк значок уонна туоһу сурук тутуохтара.

3 нэдиэлэ устата киэһэ аайы оҕо ийэтиниин төрөөбүт тылынан айымньылаах ааҕыыларын көҕүлээн туохха да кэмнэммэт иһирэх эйгэни тэрийиэҕиҥ!

Биһиги партнердарбыт – “САХА” НКИХ, С.А. Новгородов аатынан “АЙАР” кинигэ кыһата, “Чуораанчык” оҕо сурунаала, Мэҥэ Хаҥалас улууһун уопсастыбаннай түмсүүлэрэ.