Мэҥэ-Хаҥалас улууһун уһуйааннарын бары иитээччилэрэ уонна үлэһиттэрэ, ытыктабыллаах ветераннар!

Эһигини идэлээх күҥҥүтүнэн - Иитээччи уонна оскуола инниннээҕи үөрэх тэрилтэлэрин бука бары үлэһиттэрин күнүнэн Мэҥэ-Хаҥалас үөрэҕин салалтата, коллектива уонна улуус үөрэҕин үлэһиттэрин профсоюзнай комитета истиҥник эҕэрдэлиибит!

Оскуола иннинээҕи сааска оҕо бастаан бэйэтин көрүнэ үөрэнэриттэн саҕалаан, тулалыыр эйгэ кэрэтин таба көрө, кэрэхсии, төрөөбүт тылын дорҕооннорун арааран истэ, харандаас тутан уруһуйдуу үөрэнэр, бастакы доҕоттору, дьоллоох оҕо сааһы билэр. Оҕо инники дьылҕата, кини киһи быһыытынан иитиллэн тахсыыта иитээччи мындыр өйүттэн, киэҥ билиититтэн, оҕоҕо сыһыаныттан быһаччы тутулуктаах.

1926 сыллаахха Хаптаҕайга маҥнайгы оҕо былаһаакката арыллыбыта. Ити кэмтэн ыла улууспутугар оҕо саас уһуйааннара олох хаамыытыгар, үөрэхтээһин сайдыытыгар сөп түбэһэн, кэнчээри ыччаты иитиигэ, сайыннарыыга үлэлээн кэлбиттэрэ эһиил 100 сылын туолар. Күн бүгүн улууспутугар 20 уһуйаан, 17 оскуола иннинээҕи бөлөхтөр оскуолаларга айымньылаахтык үлэлииллэр. Кинилэр күннэтэ ыытыллар ситимнээх үлэлэрэ оҕо эт-хаан өттүнэн доруобай, чиҥ билиилээх, олоххо бэлэмнээх, бэйэтин омугунан, төрөөбүт дойдутунан киэн туттар киһи буола улаатарыгар туһуланар. Хас биирдии уһуйааҥҥа оҕо сылдьар эйгэтэ тупсарын, саҥа ирдэбиллэргэ эппиэттиирин туһугар сыралаах үлэ ыытыллар.

Киэҥ туттабыт уонна махтанабыт Иитээччи үрдүк аатын өрө тутан, сүрэхтэрин сылааһын оҕолорго иҥэрэн үлэлээн ааспыт уонна үлэлии сылдьар иитээччилэрбитигэр уонна уһуйааннар үлэһиттэригэр.

Күндү кэллиэгэлэр!

Кырачаан дьоҥҥо күннэтэ үөрүүнү бэлэхтиир, сырдыкка-кэрэҕэ угуйар үлэҕитигэр үгүс ситиһиини, идэҕитигэр олоҕу кытары тэҥҥэ сайдыыны, тус олоххутугар дьолу-саргыны баҕарабыт!

"Мэҥэ-Хаҥалас улууһун үөрэҕириигэ салалтата" МКТ начаалынньыгын э.т. И.М. Плотникова

Үөрэҕирии үлэһиттэрин улуустааҕы территориальнай тэрилтэтин бэрэссэдээтэлэ И.М.Скрябин