Сэтинньи 12 күнүгэр Бэдьимэҕэ улууспут баһылыга Дмитрий Иванович Тихонов көҕүлээһининэн, улуус тыа хаһаайыстыбатын салалтатын (начальник Лукин А.Е.), Баатара I нэһилиэгин (баһылык Андросов П.В.) тэрээһиннэринэн уол оҕону иитиигэ туһаайыллар “Идэһэ” тэрээһин ыытылынна. Тэрээһиҥҥэ Аллараа Бэстээх М.Е. Попов аатынан, Аллараа Бэстээх 2-ис нүөмэрдээх уонна Бэдьимэ орто оскуолатын улахан кылааһын үөрэнээччилэрэ, барыта 30 уол кыттыыны ыллылар.

Оҕолор бөлөхтөрүнэн убаһа астааһыныгар улахан дьону кытта тэҥҥэ үлэлэстилэр, төрүт дьарыкка уһуйуллан элбэҕи биллилэр. Ыраас салгыҥҥа сылдьан чэбдигирдилэр, бэйэ-бэйэлэрин кытта үлэ кэмигэр алтыһан доҕордостулар. Сибиэһэй эт миинин эбиэккэ тото-хана амсайдылар. Түмүккэ тэрийээччилэр уолаттарга хас биирдиилэригэр идэһэ этиттэн туттаран үөрдэн, инникитин үлэни өрө туталларыгар баҕа санааларын этэн дьиэлэригэр атаардылар.