Бүгүн, алтынньы 11 күнүгэр, Наахара орто оскуолата 125 сыллаах үбүлүөйдээх тэрээһинэ ыытылынна.

Оскуола устуоруйатыттан: 1885 сыллаахха таҥара дьиэтигэр “Школа грамоты” үөрэх кыһата аһыллыбыт. Бу оскуола аҕабыыттар уонна нэһилиэк бас-көс дьоно туруорсан 1900 сылтан церковнай-приходской оскуола буола уларыйбыт. Бастаан утаа Толоон Күрүө диэн сиргэ аҕабыыт дьиэтигэр балаҕан ыйын 1 күнүгэр үлэтин саҕалаабыт. Оскуола маҥнайгы учууталынан сахалыы билбэт эдэр нуучча киһитэ Левин Иннокентий Николаевич анаммыт. 1936-1937 үөрэх дьылыгар сэттэ кылаастаах оскуоланы бастакы 26 оҕо бүтэрэр. Оҕо билиитин-көрүүтүн сайыннарар араас куруһуоктарга, үлэнэн иитиигэ сүрүн болҕомто ууруллар, тыыннаах муннук аһыллар, оҕуруот аһын үүннэрэллэр. 1965-1966 үөрэх дьылыгар орто оскуола буолар. 1967 сыллаахха Наахара орто оскуолата маҥнайгы кылааһын 26 оҕону таһаарар. 2015 сыллаахха орто оскуола уһуйаанныын холбоһон, биир тэрилтэ буолан, үлэтин салҕыыр. 2021 сыллаахха оскуолаҕа нэһилиэк маҥнайгы учууталын Иван Иванович Платонов аата иҥэриллибитэ.

Биир үйэттэн ордук кэмҥэ оскуола билии сырдык уотун уматан, элбэх көлүөнэ ыччаты олоххо бэлэмнээн, төрөөбүт дойдубутугар үрдүк ситиһиилэри аҕалбыта. Оскуола истиэнэлэриттэн Саха сирин, Арассыыйабыт араас эйгэлэригэр үрдүк чыпчааллары дабайбыт элбэх чулуу дьон тахсыбыттара – биһиги барыбыт киэн туттуута буолар.

Дьоро күнүнэн улуус баһылыга Дмитрий Иванович Тихонов, норуот дьокутааттара Андрей Михайлович Находкин, Тихон Николаевич Скрябин, Н.С. Донской II аатынан үөрэх сайдыытын уонна идэ таһымын үрдэтэр үнүстүтүүт исписэлииһэ Марианна Васильевна Платонова, үөрэх салалтатын салайааччытын солбуйааччы Филипп Александрович Стручков, үөрэх үлэһиттэрин профсоюһун бэрэссэдээтэлэ Иннокентий Михайлович Скрябин, «2-с Наахара нэһилиэгэ» тыа сирин түөлбэтин баһылыга Петр Петрович Никитин, Наахара орто оскуолатын дириэктэрэ Павел Васильевич Старостин эҕэрдэ тылларын анаатылар, наҕараадалары туттардылар.

Оскуола устун экскурсия, оҕолор, учууталлар быыстапкаларын көрүү, Прокопьева Е.П. аатынан нуучча тылын кабинета арыллынна. Кэлбит ыалдьыттар, бары выпусниктар алгыһынан арчыланнылар. И.И. Платонов пааматынньыгар сибэкки дьөрбөтүн ууруу, “Парад выпускников” выпускниктар хаамыылара, “Көлүөнэлэр көрсүһүүлэрэ” дьоро киэһэ үрдүк таһымнаахтык ыытылынна.