Бу дьыл олунньу 22 күнүгэр, Аллараа Бэстээх 2№ оскуолатын саха тылын уонна литературатын үрдүк категориялаах учуутала, улуустааҕы “Сыл бастыҥ учуутала 2018” конкурус кыайыылааҕа Гоголева Анна Серафимовна айар семинара буолан ааста. Бу семинарга биир идэлээхтэрэ саха тылын уонна литературатын учууталлара, Суола Мооруктан омук тылын учуутала, үөрэх управлениетыттан методист Обутова Ольга Алексеевна уонна үлэлиир оскуолатын администрацията, бииргэ үлэлиир коллегалара кыттыыны ыллылар.

Анна Серафимовна семинарын бастакы чааһыгар икки уруогу көрдөрдө: 8 кылаастарга төрөөбүт литература уруогун Д.К. Сивцев - Суорун Омоллоон "Аанчык" кэпсээнигэр олох суолтата”, саха тыла, государственнай тыл быһыытынан 5 "а" кылаастарга (нуучча кылааһыгар) “Мин интэриэһим”. Учуутал хас биирдии уруога үрдүк таһымҥа аастылар. Уруок быыһыгар сэргэх тохтобулга II республикатааҕы уруһуй учууталларын конкурсун лауреата, уруһуй учуутала Зедгенидзева Ольга Евгеньевна маастар кылааһа итиэннэ технология, черчение учуутала Шестаков Петр Петрович хаартыскаҕа түһэриитэ киэргэттэ.

Семинар иккис чааһыгар Анна Серафимовна “Мультикультурнай эйгэҕэ сахалыы тыынынан оҕо дэгиттэр үөрүйэхтэрин таһаарыы” диэн бастакы кинигэтин презентациялаата. Кини бу хомуурунньуга биэс чаастан турар. Бастакы чааһыгар Анна Серафимовна күннээҕи да, конкуруска да кыттыбыт уруоктарыттан уонна тургутуктары киллэрбит. Иккис чааһыгар үөрэх таһынан дьарыктар педагогтарга көмө матырыйааллара: “Аман өс” текистэрэ, оҕолор өйтөн суруйуулара, хоһооннор монтажтара бааллар. Бу чааска учуутал үөрэх таһынан айымнылаах үлэтэ чаҕылхайдык көстөр, ону үөрэтэр оҕолоро аман өстөөн, хоһоон ааҕан көрдөрбүттэрэ туоһулуур. Кинигэ үһүс чааһыгар “Эстетическэй кылаас” программата, кылаас чаастарын сценарийдара киирбиттэр. Анна Серафимовна социокультурнай бырайыак иһинэн Бэстээхтээҕи култуура киинин кытта тэрийбит эстетическэй кылааһын олоҕуттан кэпсээтэ, маны таһынан үөрэппит оҕолорун төрөппүттэрэ Белолюбская Туяра Афанасьевна, Амбросьева Марфа Никифоровна кыттыыны ылбыттара семинар чааһын эбии суолталаан биэрдэ.

Анна Серафимовна үлэтин ураты өрүтүнэн үлэлиир оскуолатын эйгэтэ мультикултурнай хабааннааҕа буолар. Манна араас омук оҕолоро эйэ-дэмнээхтик бииргэ тутуһан, үөрэнэн-алтыһан сылдьыылара итиэннэ ити эйгэҕэ сахатытыы үлэтин ыытыы. Ол үлэтин туһунан суруйбут методическэй хомуурунньуктарга, сурунаалларга тахсыбыт ыстатыйалара төрдүс чааска киирбиттэр. Бэһис чааска кини үлэтин сэҥээрэн, убаастаан, сөбүлээн, үөрэнээччилэр, төрөппүттэр, коллегалар ахтыылара баар. Учуутал бу методическэй хомуурунньугун хас биирдии чааһыгар үлэлэммит үлэтин ситиһиилэрин, түмүктэрин – барытын семинарын иккис чааһыгар көрдөрдө. Анна Серафимовна айар семинарыгар сылдьыбыт биир идэлээхтэрэ олус сэргээн тарҕастылар.