Ахсынньы 12 күнүгэр Г.И. Соловьев аатынан Ороссолуода орто оскуолатыгар Мэҥэ-Хаҥалас улууһугар үөрэхтээһин төрүттэммитэ 150 сылыгар аналлаах «Герасим Иванович Соловьев уонна кини удьуора» кинигэнэн улуустааҕы "Брейн-ринг" интеллектуальнай оонньуу буолан ааста.

Уопсайа биэс нэһилиэктэн: Төҥүлү, Хаптаҕай, Бүтэйдээх, Павловскай, Аллараа Бэстээх оскуолаларын хамаандалара кэлэн кыттыыны ыллылар. Экспертэринэн үлэлээтилэр: Бүтүн Арассыыйатааҕы "Бастыҥнар Хамсааһыннарын","Мэҥэ Кэскилэ" улуустааҕы координационнай центр сүрүннүүр исписиэлииһэ-Матчитова Айыына Семеновна, Ороссолуода нэһилиэгин библиотекатын салайааччыта-Апросимова Анна Егоровна, Ороссолуода оскуолатын библиотекатын салайааччыта-Степанова Анисия Семеновна, Улуус үөрэҕэриитин музейын салайааччыта-Соловьева Валентина Ивановна уонна алын кылаас учуутала-Никифорова Надежда Николаевна.

Улууспутугар үөрэхтээһини тэрийбит киэн туттар киһибит Герасим Иванович Соловьев, кини олоҕун, удьуордарын туһунан оҕолор кинигэттэн эрэ буолбакка улууспут үөрэҕэриитин музейын салайааччытыттан Соловьева Валентина Ивановнаттан элбэх туһалаах иһитиннэриини биллилэр.

Тэрээһин арыллыытыгар кэлбит биэс оскуола выпускниктарыттан "Алтан чуораан алгыһынан" диэн оскуолабыт дириэктэри иитэр-үөрэтэр үлэҕэ солбуйааччы-Корнилова Мира Алексеевна көҕүлээн ыытар бырайыагар көхтөөх кыттыыны ылан, оҕолор бэйэлэрэ оҥорбут куар куодка эҕэрдэлээх чуорааннарын улууспут үөрэҕэриитин музейыгар өр кэмҥэ өйдөбүнньүк гына бэлэх туттардылар.

Брейн-ринг Герасим Иванович олорбут олоҕун, улууска, нэҺилиэккэ Илин-Хаҥаласка үөрэҕирии сайдарыгар уурбут кылаатын, сыратын туһунан 6 түһүмэхтээх Брейн-ринг, блиц опрос быһыытынан ааста. Оонньуу түмүгүнэн 3 миэстэни А.С. Шахурдин аатынан Төҥүлү орто оскуолата, 2 миэстэни, К.О. Гаврилов аатынан Бүтэйдээх оскуолата уонна 1 миэстэни ыаллыы сытар Кеша Алексеев аатынан Хаптаҕай орто оскуолата ылла. Миэстэлэспит хамаандалар дипломнарынан, минньигэс бэлэхтэринэн наҕараадаланнылар, кыайыылаах хамаандаҕа кубок туттарылынна.

Кылгас бириэмэҕэ улууспут, дойдубут киэн туттар киһитин-Герасим Иванович Соловьев туһунан элбэҕи билбит, сыралаах үлэттэн тахсыбыт икки туомнаах кинигэнэн бэлэмнэнэн кэлбит хамаандаларга махтанабыт.