2024 сыл кулун тутар 26 күнүгэр үгэскэ кубулуйбут XXXV-c үөрэх үлэһиттэрин спартакиадата бэрт тэрээһиннээхтик Тимир Пинегин аатынан Парус спортивнай комплекска буолан ааста. Уопсайа 10 кустовой холбоһук хамаандалара дуобат, саахымат, остуол тенниһэ, салгын саатынан ытыы, дартс уонна волейболга, харбааһынҥа эстафета, эдэр ыал ГТО нормативтарын туттарыы күрэҕэр курдук көрүнҥэргэ ыытылынна.

Быйылгы спартакиадаҕа күрэхтэһэр көрүҥ аайы кустовой холбоһуктан түөртүү үөрэх тэрилтэтин салайааччыта эбэтэр солбуйааччыта кыттыыта балаһыанньанан ирдэннэ. Күрэхтэһии үөрүүлээх чааһыгар улуустааҕы үөрэх салалтатын салайааччыта Гаврил Николаевич Толстяков, улуус баһылыгын собуйааччы Василий Валерьевич Филиппов уонна улуус үөрэҕин үлэһиттэрин профсоюһун председателя Иннокентий Михайлович Скрябин эҕэрдэ тылларын эттилэр уонна быйылгы сыл Мэҥэ Хаҥаласка үөрэхтээһин тэриллибитэ 150, Россияҕа дьиэ кэргэн сылларыгар анаан ыытыллар сүрүн тэрээһиннэргэ болҕомто уурдулар, спорт бэтэрээннэригэр үөрэх үлэһиттэрин республикатааҕы комитетын, улуус үөрэҕин салалтатын бочуотунай грамоталарын туттардылар.

Күрэхтэһии түмүгүнэн 1 миэстэ Төҥүлү кустовой холбоһуга (салайааччы Сотников Вячеслав Егорович), 2 миэстэ Хара кустовой холбоһуга (салайааччы Стручков Алексей Анатольевич), 3 миэстэ Наахара кустовой холбоһуга (салайааччы Бурнашев Василий Павлович) буоллулар. Кыайыылаахтар 6 миэстэҕэ дылы сыаналаах бириистэринэн наҕараадаланнылар.

Мэҥэ Хаҥалас үөрэҕин үлэһиттэрин профсоюһа