Муус устар 20 күнүгэр Р.Г. Васильев аатынан кыраайы үөрэтэр түмэлгэ улуустааҕы үөрэтэр-оҥорон таһаарар эбии үөрэхтээһинин сатабыллаах уһуйааччыларын уонна дьоҕурдаах оҕолорун «Үгэс уонна аныгы кэм» диэн ааттаах уус-уран оҥоһуктарын быыстапката арылынна.

Айар түһүлгэҕэ төрүт уонна аныгы ньымаларга уһуйар куруһуоктар оҕолорун уонна уһуйааччыларын дэгиттэр талааннара арылынна. Ол курдук, «Уран уус» куруһуок салайааччыта СР норуотун маастара Скрябин Федор Васильевич үөрэтэр оҕолорун Жирков Юра, Попов Мичил мастан оҥоһуктара, «Күлүм» куруһуок салайааччыта Мэҥэ Хаҥалас улууһун уран тарбахтаах маастара Баишев Сарыал Суор Уола үөрэтэр оҕолорун муостан уонна алтантан оҥоһуктара, «Паперкрафт» куруһуок салайааччыта республикатааҕы «Сүрэҕим сылааһын оҕоҕо аныыбын» күрэх кыайыылааҕа Ефимова Алена Андреевна үөрэтэр оҕолорун кумааҕыттан аныгы ньыманан оҥоһуктара, «АртДекор» куруһуок салайааччыта Харитонова Татьяна Дмитриевна үөрэтэр оҕолорун дрифтвуд ньыманан сувенирнай оҥоһуктара ыалдьыттары сөхтөрдүлэр.

Бу үөрүүлээх күн быыстапка кыттыылаахтара улууска үлэ уопутун тарҕатыыны туоһулуур сертификаттары, махтал суруктары туттулар.

Күндү улууспут олохтоохторун сонун быыстапканы көрөргүтүгэр ыҥырабыт.

Айар үлэнэн – кэлэр кэми түстүүбүт, кэнчээри ыччаты кэрэҕэ сирдиибит!