Балаҕан ыйын 16 күнүгэр В.П. Ларионов аатынан Майа орто оскуолатыгар “Фестиваль профессий” тэрээһин чэрчитинэн оскуола оҕолоругар профориентационнай кылаас чаастара буолан аастылар.

Чүүйэ, Хара, Матта, Томтор, Бөкө, Майа оскуолаларын 8-11 кылаас үөрэнээччилэригэр СӨ Нэһилиэнньэ дьарыктаах буолуутун судаарыстыбаннай кэмитиэтин бэрэссэдээтэлэ Горюшинская Светлана Валентиновна, СӨ Үөрэх уонна наука миниистирэ Соколова Нюргуна Афанасьевна, СӨ Тыа хаһаайыстыбатын уонна ас-үөл бэлиитикэтин миниистирин солбуйааччыта Стручкова Анна Александровна, СӨ Предпринимательство, эргиэн уонна туризм миниистирин бастакы солбуйааччыта Карбушев Максим Геннадьевич, СӨ Транспорт уонна суол-иис хаһаайыстыбатын миниистирин солбуйааччыта Рафаилова Ольга Николаевна “Диалог на равных” диэн тиэмэлээх 4 былаһаакканан кэпсэтии ыыттылар.

Оҕолор бу көрсүһүүлэргэ бырайык оҥорон, көмүскээн, профориентационнай тэттик тургутук толорон, интэриэһинэй, наадалаах тиэмэҕэ кэпсэтэн бэйэлэригэр өссө эбии туох эрэ саҥаны, туһалааҕы арыйан, сүргэ көтөҕүллэн барбыттара буолуо диэн эрэнэбит.

Сыромятникова Шура 11 «б» кылаас үөрэнээччитэ: “Бүгүн биһиэхэ Нюргуна Афанасьевна профориентационнай беседа ыытта уонна бырайыак оҥоттордо. Профориентационнай кэпсэтиигэ орто уонна үрдүк үөрэх, аспирантура туһунан билиһиннэрдэ, үөрэх уонна наука тула кэпсэттибит. Кылаас чааспыт иккис аҥарыгар 4 хамаандаҕа арахсан бырайыак оҥордубут. Икки тиэмэ биэрбитэ: биирэ "Школа будущего", иккиһэ "Учитель будущего". Оҕолор санааларын, көрүүлэрин истэн саҥа идиэйэлэр киирдилэр, ыалдьыттары уонна оҕолору кытта олус үчүгэйдик тэҥинэн, биир тыл булан кэпсэттибит”.

Маны таһынан Мэҥэ-Хаҥалас улууһун СӨ Нэһилиэнньэ дьарыктаах буолуутун Госкомитета, ООО «ПрофЯКТ» төрөппүттэри кытта «Помоги ребенку добиться успеха!» диэн тиэмэлээх олус туһалаах көрсүһүү тэрийдэ.