Доллу нэһилиэгин Социалистическай үлэ Геройа Тарас Гаврилович Десяткин аатынан Тумул орто оскуолатыгар кулун тутар 23 күнүгэр өр сылларга үлэлээбит, үөрэх–билии аартыгын аспыт үтүө дьоннор, педагогическай үлэ ветераннара Фекла Романовна, Георгий Гаврильевич Игнатьевтар ааттарынан V педагогическай ааҕыылар ыытылыннылар. Ааҕыыларга алын кылаас учууталлара, детсад иитээччилэрэ, эбии үөрэхтээһин педагогтара бэйэлэрин баай уопуттарын биэс секциянан наардаһан кэпсээттилэр, үллэһиннилэр.

Ааҕыы икки түһүмэҕинэн ааста, ол курдук кэтэхтэн түһүмэххэ уопсайа 66 үлэ киирдэ. Киирбит үлэлэринэн брошюра бэчээттэннэ. Очнай түһүмэххэ уопсайа 37 педагог кытынна. Экспертэринэн улуус үөрэҕин управлениетын специалистара, Доруобуйа ситимин оскуолаларын директордара, ХИФУ МИ преподавателлэрэ, педагогоческэй үлэ ветераннара үлэлээтилэр. Ааҕыыларга Горнай, Нам, Хаҥалас, Таатта, Үөһээ Бүлүү, Амма улуустара, Дьокуускай куорат, бэйэбит улууспут педагогтара кытыннылар.

Маны сэргэ саҥа сүүрээнинэн улуус доруобуйа ситимин оскуолаларын үөрэнээччилэригэр аналлаах 1 Игнатьевскай ааҕыылар ыытылыннылар. НПК медицинскэй наукалар, спорт, чөл олох диэн хайысхаларынан ыытылыннылар, Дьүүллүүр сүбэ оҕолор үрдүк таһымнаах үлэлэрин бэлиэтээтилэр.

Ааҕыылар истэринэн педагогическай үлэ ветераннара Фекла Романовна, Георгий Гаврильевич Игнатьевтар үлэлээбит оскуолаларыттан, аймахтарыттан, кинилэр үлэлэрин сырдатар, ааҕыылар саҕаламмыт сылларын кэпсиир, сырдатар экспозиция көрдөрүллүбүтүн кыттааччылар, ыҥырыылаах ыалдьыттар сэргээтилэр.

Салҕыы Игнатьев В. Г төрөппүттэрин туһунан "Учуутал Игнатьевтар" кинигэ сүрэхтэниитэ истиҥ быһыыга майгыга ааста. Көрсүһүүгэ Игнатьевтар үөрэппит Дьабыыл, Матта, Доллу оскуолаларын выпускниктара учууталларын туһунан ахтыы онордулар. Ааҕыылары Игнатьев В. Г., медицинскэй наука доктора, профессор, ХИФУ МИ уопсай хирургия салайааччыта, Игнатьевтар аймахтар, Доллу нэһилиэгин олохтоох администрацията (баһылык Сивцев Н. П.), Тумул орто оскуолатын коллектива (директор Иванова М.В.) биир санаанан түмүллэн, көмөлөөн ыыталлар.

Матрена Васильевна Иванова,

Т.Г. Десяткин аатынан Тумул орто оскуолатын директора