Бүгүн, тохсунньу 15 күнүгэр, биир дойдулаахпыт ФЕДОР КУЗЬМИЧ ПОПОВ Аҕа Дойдуну көмүскүүр Улуу сэриигэ Днепр өрүһү туорааһыҥҥа уһулуччу хорсун быһыыны оҥорбутун иһин ССРС Верховнай Сэбиэтин Уурааҕынан Советскай Союз Геройун үрдүк аата иҥэриллибитэ 81 сылын туолла.
Бу күҥҥэ олоҕуран улуус оскуолаларыгар араас хабааннаах патриотическай тэрээһиннэр: торжественнай линейкалар, “Хорсун санаа” уруоктара, кылаас чаастара, Геройга анаммыт хоһооннору ааҕыылар, радио эфир нөҥүө Федор Кузьмич Попов оҥорбут хорсун быһыытын туһунан школьнай пресса сырдатыылара, выставкалар, байыаннай-спортивнай оонньуулар ыытылыннылар. Оскуола үөрэнээччилэрэ Герой аатын-суолун үйэтитэр Кыайыы монуменнарыгар Сыымахха, Төхтүргэ, Майаҕа миитиннэргэ уонна Ф.К. Попов памятниктарыгар гирляндалары уурууга кытыннылар.
Аҕа Дойдуну көмүскүүр Улуу сэрии толоонугар хорсун быһыыны оҥорбут сахалартан бастакы Советскай Союз Героя Федор Кузьмич Попов аатынан киэн туттабыт, биир дойдулаахпыт сырдык мөссүөнүгэр сүгүрүйэбит!








|