Бүгүн, кулун тутар 4 күнүгэр З.Я. Осипова аатынан Павловскайдааҕы "Мичээр" ОСК муусука салайааччыта Егорова Фея Петровна "Айымньылаах үлэбин сэгэтэн" диэн айар үлэтин отчеттуур тэрээһинэ буолан ааста.

Уопсайа 18 ыалдьыт муһунна. Дьокуускайтан Үөрэҕи сайыннарар уонна идэни үрдэтэр институттан Оҕону иитии уонна эбии үөрэхтээһин кафедратын доцена, "Музыка для всех" проект салайааччыта Дуткина Е.П., улуустааҕы үөрэҕирии салалтатын инфомационно-методическэй отдел главнай специалиһэ Ларионова М.Н., ыраах-чугас сытар нэһилиэктэр уһуйааннарыттан муусука салайааччылара, Павловскайбыт бэтэрээннэрин сэбиэтин бэрэссэдээтэлэ, В.Н. Оконешников аат. орто оскуола эбии үөрэх салайааччылара, муусука учууталлара, "Айылгы" НАК специалистара, чугас аймах-билэ дьонноро муһуннулар.

Тэрээһин Дьөһөгөй Айыы туомун түһэрииттэн саҕаланна, салҕыы "Үрүйэчээн долгуннара" уһуйаан оҕолорун кэнсиэрэ, "Тапталынан иитии" Фея Петровна кинигэтин сүрэхтэниитэ, "Хоту дойду матыыба" аһаҕас дьарык, "Хомус абылаҥа" саха норуотун инструменыгар оонньуурга сөпкө тыыныыга маастар кылаас тиһигин быспакка биир тыынынан өрө күүрүүлээхтик ааста.