Ыам ыйын 31 күнэ Холгума нэһилиэгэр биир сүдү улахан суолталаах күн буолар. Бу күн ССРС суруйааччыларын Сойууһун чилиэнэ, литэрэтиирэни ырытааччы, бэйиэт, үтүөлээх учуутал Егор Петрович Шестаков-Эрчимэн төрөөбүт күнэ. Бу күнү тэҥҥэ батыһа Бырама сүрүн орто үөрэхтээһин оскуолатыгар биир дойдулаахпыт Эрчимэн бюһун арыйыы күнэ буолла.

Бюст арыллыытыгар Улуус баһылыгын социальнай боппуруоска солбуйааччы Свинобоев М.А., социальнай көмүскэл салалтатын начальнига Шестаков И.И., Егор Петрович-Эрчимэн оҕолоро, сиэннэрэ, үөрэнээччилэрэ күндү ыалдьыт буоллулар. Бырама оскуолатыгар мээнэ буолбатах түгэн буолан ааста диэн бэлиэтиэххэ сөп. Бу күн биһиги оскуолабытыгар Саха сирин биллэр-көстөр суруйааччылара ыалдьыттаан, кинигэ сүрэхтээн бардылар. Ол курдук, Семен Андреевич Попов-Сэмэн Тумат, Павел Николаевич Харитонов-Ойуку, Иван Иванович Осипов- Ойуур Уйбаан, Гаврил Гаврильевич Андросов. Ону кытары Бырама оскуолатын меценаттара Егор Егорович Шестаков, Валентина Дмитриевна Петрова, Филипп Александрович Стручков кэлэ сырыттылар.

Бюст арыллыытын Герман Яковлевич алгыстаабыта, арчылаабыта. Оскуолабыт үөрэнээччилэрэ биир дойдулаахпыт, көмүс куолас Эдьиий Марыына репертуарыттан ыалдьыттарга ырыа бэлэх ууннулар.

Үөрүүлээх күн иккис чааһа- Эрчимэн. «Өксөкүлээх өрүү тыыннаах» кинигэ сүрэхтэниитэ буолан ааста.

Сотору кэминэн бюст тула сквер оҥоһуллара былааннанар.

Бырама сүрүн орто үөрэхтээһин оскуолата