Бүгүн, кулун тутар 14 күнүгэр Мэҥэ-Хаҥалас улууһугар «Драйверы образования» күрэх иккис төгүлүн ыытылынна.

Ил Дархан А.С. Николаев Саха Өрөспүүбүлүкэтигэр үөрэҕирии сайдыытын стратегическай хайысхаларын туһунан уурааҕар олоҕуран үөрэх тэрилтэлэрин салайар хамаандаларыгар улахан болҕомто ууруллубута. Биһиги улууспут пилотнай улуус быһыытынан бу сылларга бэйэ-бэйэни (горизонтальнай) үөрэтиигэ актыыбынайдык кыттан өрөспүүбүлүкэҕэ уопутун киэҥник тарҕатта. Майа В.П. Ларионов, Ф.Г. Охлопков аатынан оскуолалара, Майатааҕы лиссиэй, Аллараа Бэстээх М.Е. Попов аатынан оскуола, 2-с №-дээх оскуолата, Төҥүлү, Павловскай орто оскуолаларын уопута биһирэммитэ.

Оскуола дириэктэрдэрин күрэхтэрэ өрөспүүбүлүкэҕэ 4 төгүл ыытыллыбытыттан 2 төгүл биһиги улууспут дириэктэрдэрэ муҥутуур кыайыылаах, биирдэ  призер аатын сүкпүттэриттэн биһиги киэн туттабыт.

Быйылгы күрэххэ Ф.Г. Охлопков аатынан Майа орто оскуолатын, Кеша Алексеев аатынан Хаптаҕай орто оскуолатын, Моорук орто оскуолатын салайар хамаандалара кыттыыны ыллылар. Кинилэр 3 түһүмэҕинэн илин-кэлин түһүстүлэр.

Түмүккэ  Моорук орто оскуолатын салайар хамаандата  (дириэктэр Апросимова Людмила Андреевна) кыайыылаах аатын сүктэ. Кеша Алексеев аатынан Хаптаҕай орто оскуолатын (дириэктэр Кычкина Ирина Владимировна), Ф.Г. Охлопков аатынан Майа орто оскуолатын (дириэктэр Захаров Андрей Вадимович) салайар хамаандалара призер буоллулар. Өрөспүүбүлүкэтээҕи күрэххэ Моорук, Хаптаҕай орто оскуолаларын хамаандалара улуус чиэһин көмүскүөхтэрэ.