Олунньу 12 күнүгэр Анна Егоровна Зыкова аатынан Майатааҕы «Мичил» оҕону сайыннарар киин 90 сылыгар аналлаах «Дьиэ кэргэн уонна уһуйаан – оҕону иитиигэ биир сомоҕо» семинарга улууспут 33 иитээччитэ кыттыыны ыллылар.

Семинарга биир идэлээхтэрбит Бүтэйдээхтэн, Чүүйэттэн, Аллараа-Бэстээхтэн, Рассолодаттан, Павловскайтан, Хараттан уонна Майаттан ыалдьыттаатылар.

Бу күн мустубут педагогтарга "Мичил" уһуйаан иитээччилэрэ аһаҕас дьарыктары, маастар-кылаастары үрдүк таһымнаахтык бэлэмнээн көрдөрдүлэр. Ону таһынан кыттыыны ыллылар Дьокуускай куораттан “Сайдыс” эбии үөрэхтээһин педагогтара Майя Семеновна Павлова, Марианна Егоровна Ксенофонтова, Вилюяна Васильевна Скрябина уонна төрөппүт Татьяна Дмитриевна Харитонова.

Түмүккэ бары - Хас биирдии ыал оҕону иитиигэ үтүө өрүттэрдээх, үгэстэрдээх, ону оҕо тэрилтэтин иитэр-үөрэтэр үлэтигэр туһаныахха, дьиэ кэргэни кытта биир сыалы-соругу туруорунуохха диэн өйтөн-санааттан семинар тэриллэн, олус наадалаах, бириэмэтигэр сөптөөх диэн санааҕа кэлэн тарҕастылар.