Бүгүн, 2025 с. бэс ыйын 11 күнүгэр, Мэҥэ Хаҥалас улууһун Дьабыыл нэһилиэгэр ураты үөрүүлээх күн үүннэ. Н.В. Петров аатынан агротехнологическай хайысхалаах орто оскуола Чаачыгый сайылык сиригэр-уотугар баар «Илгэ» стационарнай үлэ-сынньалаҥ лааҕырын оҕолоро олороллоругар түргэн конструкциянан тутуллубут, бары ирдэбилгэ толору эппиэттиир, саҥардыллыбыт 2 корпустарын аһыллыыта үрдүк таһымнаахтык ыытылынна.

Үөрүүлээх тэрээһиҥҥэ Саха Өрөспүүбүлүкэтин Ил Дархана Айсен НИКОЛАЕВ кыттан оҕолору, олохтоохтору, улуус үөрэҕириитин үлэһиттэрин истиҥник эҕэрдэлээтэ. Кинини олохтоохтор оҕолуун, улахан дьоннуун бүттүүн уруйдаан көрүстүлэр.

Лааҕыр материальнай-техническэй базата өссө тупсарыллан, кэҥээн, "Үөрэҕирии сайдыыта" федеральнай бырагырааманан түргэнник тутуллар 125 миэстэлээх, толору хааччыллыылаах, оҕо сынньанар усулуобуйата толору тэриллибит икки дьиэ тутуллан үлэҕэ киирдэ

Кэнчээри ыччаппыт тупсаҕай көстүүлээх, аныгы кэм ирдэбиллэригэр толору эппиэттиир лааҕырга сынньаналларыгар, тыа сирин олоҕун билэн, буһан-хатан үлэҕэ уһуйуллалларыгар, төрүт үгэстэрбитигэр сыстан, үүнэн-сайдан тахсалларыгар, төрөөбүт дойдуларын таптыыр, харыстыыр дьон буола улааталларыгар былааннаах үлэни салгыы ыытыахпыт

Ил Дархаммыт Айсен Николаев, өрөспүүбүлүкэбит салалтата тыа сирин сайдыытыгар, баар кыһалҕаларын быһаарарга былааннаах үлэни ыыталлар. Ол курдук аҥардас быйылгы дьылга Аллара Бэстээххэ, Майаҕа балыыһалар, Мөҥүрүөн нэһилиэгэр кырдьаҕастар дьиэлэрэ үлэҕэ киириэхтэрэ, хаарбах дьиэттэн 7 нэһилиэккэ 243 ыал саҥа дьиэҕэ көһүөхтэрэ, икки нэһилиэкпитигэр күөх төлөн тиийиэҕэ. Итиэннэ Бэдьимэҕэ өр күүтүүлээх оскуола тутуллуута саҕаланна

Ил Дархаммытыгар Айсен Сергеевич Николаевка, өрөспүүбүлүкэбит салалтатыгар дириҥ махталбытын биллэрэбит. Салгыы даҕаны биир ситимнээхтик ыытар үлэбит-хамнаспыт үтүө түмүктээх, үрдүк ситиһиилээх буолуо диэн эрэнэбит.