Муус устар 28 кунугэр Ил Дархан Айсен Николаев өрөспүүбүлүкэ араас улуустарын үөрэх кыһаларын - оскуолалар, колледжтар салайааччыларыгар саҥа ГАЗ автобус күлүүстэрин туттарда.

Биһиги улууспутугар икки автобус — Егор Кычкин аатынан Матта орто оскуолатыгар уонна Дмитрий Таас аатынан Хорообут орто оскуолатыгар ананна.

— Саҥа автобус күлүүһүн тутан үөрүүбүт, махталбыт муҥура суох. Мантан инньэ үөрэнээччилэрбит араас күрэхтэргэ, олимпиадаларга кытта баралларыгар бас билэр тиэхиньикэлэннибит. Автобустар биһиги эрэгийиэммит килиимэтигэр толору эппиэттиир гына, оҕолору таһарга куттала суох анал оҥоһуулаахтар. Түгэнинэн туһанан улууспут аҕа баһылыгар Д.И. Тихоновка, улууспут үөрэҕириитин салалтатын начальнигар Н.Г. Толстяковка барҕа махталбытын тириэрдэбит – диэн Матта орто оскуолатын директора Антонина Находкина уонна Хорообут орто оскуолатын директора Владислав Иванов этэллэр.