Мэҥэ-Хаҥалас улууһун Балыктааҕар 150 миэстэҕэ анаммыт саҥа оскуола үөрүүлээх быһыыга арылынна. Олохтоохтор өр сылларга туруорсан, туруулаһан ситиспит ситиһиилэрэ тупсаҕай көстүүлээх икки этээстээх таас тутууну “Электромонтаж” тэрилтэ хаачыстыбалаахтык тутан дьэндэппитэ сырдыкка-үтүөҕэ сирдиир кэрэ көстүүлээх үөрэх кыһата кэлэр 2021 сылга үөрэнээччилэри долгуйа көһүтэр.

Биллиилээх государственнай деятель Михаил Габышев аатын сүгэр Балыктаах оскуолатын үөрүүлээх аһыллыытын ыалдьыттарынан СР Правительствотын Бэрэссэдээтэлин бастакы солбуйааччыта Кирилл Бычков, Ил Түмэн Бэрэссэдээтэлин бастакы солбуйаччыта Александр Жирков, СР үөрэҕин миниистирэ Михаил Сивцев, тутуу миниистирэ Павел Кылатчанов, наукаҕа, үөрэҕириигэ, культураҕа, сонуну тарҕатар эйгэҕэ уонна общественнай холбоһуктар дьылаларыгар Парламент сис кэмитиэтин бэрэссэдээтэлэ Феодосия Габышева, тыа сиригэр аграрнай политикаҕа бэрэссэдээтэлэ Андрей Находкин, норуот депутата Юрий Баишев буоллулар.

Оскуола дириэктэригэр Айталина Мохначевскаяҕа символическай күлүүһү “Электормонтаж” тэрилтэ дириэктэрэ Василий Пинигин туттарда. Оскуола аалай кыһыл лиэнтэтин СР Правительствотын Бэрэссэдээтэлин бастакы солбуйааччыта Кирилл Бычков, Ил Түмэн Бэрэссэдээтэлин бастакы солбуйаччыта Александр Жирков, СР үөрэҕин миниистирэ Михаил Сивцев, улуус баһылыга Николай Старостин, улуустааҕы үөрэх управлениетын начальнига Ирина Черкашина кырыйдылар.  

Саҥа оскуола ис-тас өртө барыта ситэн-хотон туох баар тэрилинэн-тээбирининэн толору хааччыллыбыт. Тыа сирин аныгы оскуолатыгар информатика кабинетыгар саҥа компьютердар, роботехника набордара кэлэн турбуттар. Аныгы технологиялары туһанан оҕолору үөрэтэргэ бары усулуобуйа олохтоммут.

Хас биирдии үөрэнээччи бэйэтин саастыылааҕыттан, атын ханнык даҕаны омук ыччатыттан, бэйэтин көлүөнэтиттэн хаалсыбат личноһы иитэн-үөрэтэн таһаарыы бу бүгүҥҥү салалта иннигэр турар улахан государственнай суолталаах сорук буолар. Республика Бырабыыталыстыбата сыллата 10 саҥа оскуоланы үлэҕэ киллэрэр. Бу ирдэбиллэргэ барытыгар эппиэттиир тутуулар билигин тыа сиригэр ыытыллаллар. Мэҥэ-Хаҥалас улууһугар аҥардас тутууга республикаттан, федеральнай киинтэн үбүлэнэн үгүс тутуулар баралларын бэлиэтээтилэр.

Оскуола аһыллыытын үөрүүлээх тэрээһинигэр кэлбит ыалдьыттар эҕэрдэ тылларын эттилэр, бэлэхтэри туттардылар. Тутааччыларга, бастыҥ үлэлээхтэргэ, учууталларга наҕараадалары туттардылар. Балыктаахха уһун кэмҥэ дириэктэрдээбит, баһылыктаабыт улуустааҕы үөрэх управлениетын начальнигар Ирина Черкашинаҕа “СР үөрэҕириитин үтүөлээх үлэһитэ” үрдүк наҕарааданы СР Правительствотын Бэрэссэдээтэлин бастакы солбуйааччыта Кирилл Бычков үөрүүлээх быһыыга туттарда.Тэрээһини оҕолор эҕэрдэ үҥкүүлэрэ, эдэр учууталлар ВИА-лара “Балыктаах киэһэтэ” ырыанан киэргэттилэр. 

Зоя Герасимова.