Үөрэх саҥа чиэппэрэ саҕаланыытыгар, муус устар 2 күнүгэр, оскуолабытыгар Ил тумэн наукаҕа, үөрэххэ, культураҕа сис комитетын бэрэссэдээтэлэ Габышева Феодосия Васильевна, Мэҥэ-Хаҥалас улууһун үөрэҕин управлениетын начальнига Черкашина Ирина Васильевна саҥа оскуолаҕа үлэ-хамнас тэриллиитин билсиһэр соруктаах кэллилэр. Оскуоланы көрөн-истэн баран, учууталлары, салайааччылары кытта төгүрүк остуол тула олорон, дойду үрдүнэн тахсар уларыйыыларга тохтоон, кэпсэтии тэрилиннэ. Феодосия Васильевна тыа сиригэр оҕо үөрэнэригэр эргиччи үчүгэй усулуобуйалаах оскуолалар, уһуйааннар элбээн иһэллэрэ үөрдэрин бэлиэтээтэ. Инникитин кыра нэһилиэнньэлээх сирдэргэ саҥа технологиянан түргэн тэтиминэн тутуллар кыра объектары тутар табыгастаах буолуоҕун кэпсээтэ. Тыа сиригэр оҕону үлэнэн иитии куруутун да көдьүүстээҕин бэлиэтээн туран, агрохайысхалаах оскуолаларга практическай үлэни тэрийэр сонун техника, оборудование наадатын бэлиэтээтэ. Билиҥҥи кэмҥэ Уһук Хоту дойдуга да олордорбут араас боруобалыыр үлэлэри тэрийэн, үүнээйи арааһын олордон көҕөрдүү үлэтин ыытар табыллар дьыала буоларын этэн туран, ылсыһарбытыгар ыҥырда. Ону сэргэ бу кэлиҥҥи кэмҥэ тахсыбыт уларыйыыларга барыбытын долгутар төрөөбүт тылбыт тула тахсар кэпсэтиилэр, ону кытта оскуолабытыгар үөрэтэр саха тылын чааһа эбиллэрин тула барар туруорсууларга тохтоото. Төһө да республика өттүттэн сөптөөх санаалар этиллэ туралларын үрдүнэн бэйэбит таларбытынан чааһы уларытар кыахпыт суоҕун, кэпсэтиһэр үлэлэр ыытылла туралларын эттэ.

Түмүккэ, оҕо дьоҕурун таба тутан, ону сайыннаран, кэнэҕэһин үтүө үлэһит, сайдыылаах, киэҥ өйдөөх-санаалаах ыччаты иитэн таһаарарбытыгар баҕа санаатын биллэрдэ. Салайааччыбыт Ирина Васильевна Феодосия Васильевна бу тыа сирин оскуолалара сайдыыларыгар, салайааччылар туруорсар бары боппуруостарыгар куруук болҕомтотун күүскэ уурарын, ситимнээхтик үлэлэһэрин, көмөлөһөрүн бэлиэтээн улахан махталлаахпытын биллэрдэ. Инникитин тахсаары турар уларыйыылары сэргэ оҕо, үлэһит ахсааныттан тутулуктанан хамнас араастаһарын тула санаатын үллэһиннэ. Төгүрүк остуолтан сонуннары истэн, ыйытыылары биэрэн, икки өттүттэн санаа атастаһан тарҕастыбыт.

Мохначевская Айталина Михайловна, 
М.П. Габышев аатынан Балыктаах орто оскуолатын дириэктэрэ