Бүгүн, сэтинньи 18 күнүгэр Төҥүлүтээҕи "Олимпионик" оҕо сайдар киинин логопед-учууталын Баишева Варвара Григорьевна "Уһуйуу төрдө-оҕо төрөөбүт саҥата" диэн айар үлэтин отчуоттуур тэрээһинэ үрдүк таһымҥа буолан ааста. Манна “Кэскил” ПМСС кииниттэн, улууспут уһуйааннарыттан учуутал-логопедтар, тыл сайдыытыгар үлэлэһэр иитээччилэр барыта 24 ыалдьыт муһунна.

Тэрээһин Варвара Григорьевна 25 сыллаах айар үлэтин чэрчитинэн буолла. Ааптарыскай үлэ уһуйааммыт түмэлигэр Варвара Григорьевна бу сыллар тухары түмпүт үлэтин сырдатар материаллар ону тэҥэ сөбүлүүр дьарыгын: оҕуруонан, онтон да атын илии оҥоһуктарын, хаартысканан аныгылыы кинигэлэрин, үлэтигэр анаабыт оҥоһуктарын быыстапкатыттан, кабинетыгар экскурсияттан саҕаланна.

«Төрүт дорҕоону, тылы сайыннарыы» Баишева В.Г. бэйэтэ айбыт дорҕоону, тылы сайыннарар бэртээхэй оонньууларынан кэллиэгэлэрэ ыалдьыттары оонньоотулар. Оонньуу быраабылатын билистилэр, хайдах оҥоһуллубутугар үөрэннилэр.

«Дорҕоонноох кинигэ» аһаҕас дьарыгар баай опыттаах логопед-учуутал Варвара Григорьевна ааптарыскай ньымаларын, оонньууларын туһанан сүрдээх интириэһинэй дьарыгы ыытта.

«Сахалыы саҥарабын» маастар-кылааска төрөппүтү сырдатар Программаҕа (Программа просвещения родителей) киирбит үлэ көрүҥнэрин бэйэтин үлэтин опытыгар олоҕуран кэпсээтэ, көрдөрдө. Маастар- кылаас иккис аҥарыгар педагогтар хамаандаларга арахсан оҕо саҥатын сайыннарыыга төрөппүт оҕотун кытта дьарыктанарыгар сөптөөх араас ньымалары толкуйдаан көмүскээтилэр.

Тэрээһини түмүктүүр төгүрүк остуолга мустубут дьон билиҥҥи оҕо тылын сайдыытыгар сытыытык турар сүрүн кыһалҕалары кэпсэттилэр. Оҕону төрөөбүт тылынан саҥардарга практик логопедтар бэйэлэрэ тобулан, токуйдаан араас методикалары, ньымалары сахатытан, тылбаастаан үлэлэригэр тутталларын тула кэпсэттилэр, опыт атастастылар. Кэлбит ыалдьыттар элбэҕи эбинэн, үөрэн-көтөн, бу тэрээһини иилээн-саҕалаан тэрийбит "Олимпионик" уһуйаан кэлэктиибигэр (директор Стручкова Г.А.) махтанан тарҕастылар.

“Олимпионик” киин сүрүннүүр иитээччитэ Шестакова С.Ф.