Алтынньы 16 күнүгэр Бүтэйдээххэ биллиилээх биир дойдулаахпыт, 20-с үйэ чулуу педагога А.Н. Анисимов төрөөбүтэ 100 сыла бэлиэтэннэ. Оскуолаҕа анал кылаас чаастара, быыстапка, радиопередача буоллулар. Хас биирдии ыалга Эркээйигэ тахсыбыт анал балаһа тарҕанна. Күнүс нэһилиэк олохтоохторо А.Н. Анисимов дьиэтин тэлгэһэтигэр мустан улахан учууталы ахтан-санаан аастыбыт. Оскуола, үөрэх управлениетын аатыттан директор Т.Н. Пономарева, дьаһалтаттан Н.С. Прокопьева ветераннартан А.И. Филиппова, депутат В.И. Чямпина, аймахтартан Я.И. Борисов, эдэрдэртэн В.Н. Кириллин, үөрэнээччилэртэн Надя Осипова иһирэх ахтыы, эҕэрдэ тылларын эттилэр. Андрей Николаевичка анаммыт ырыа ылланна, хоһоон ааҕылынна. Түмүккэ саҥа мемориальнай дуоска аһылынна, сибэкки дьөрбөтө уурулунна. Музейга Сүдү киһиэхэ сүгүрүйэбит диэн лекторий буолла. Улахан учуутал төрөөбүт күнүгэр кини туһунан кинигэ тахсан бэртээхэй бэлэх буолла.

Бүтэйдээх орто оскуолата