Олунньу 7 күнүгэр Бүтэйдээх оскуолатыгар педагог-библиотекарь, СӨ үөрэҕириитин туйгуна Васильева Елена Тимофеена үлэтин уопутун билсэр сыаллаах семинар буолан ааста. Барыта 21 оскуола педагог-библиотекарьдара тымныыны аахсыбакка айаннаан, улууспут биир кырдьаҕас нэһилиэгин, оскуолатын баай уопутун көрдүлэр.

Васильева Е.Т. оскуолаҕа араас хайысхалаах ааҕыыны көҕүлүүр бырайыактары үлэлэтэр. Улуустааҕы “Бастыҥ ааҕар кылаас” бырайыакка ситиһиилээхтик кытыннарарын таһынан, оскуола иһигэр «Кэрэхсэбиллээх кэпсээннэр» радиожурнал, алын кылаастарга «Книжная радуга», 1-11 кылаастарга «Литературный Бютейдях», орто сүһүөх кылаастар уолаттарыгар «Толоон хоһууттара», 5-11 кылаастарга «Буктрейлер», чинчийиэн баҕалаахтарга “Билим” бырайыактары үлэлэтэр. Кылаас салайааччыларын, эбии үөрэхтээһин педагогтарын, кулууп, олохтоох түмэл уонна олохтоох библиотека үлэһиттэрин, төрөппүттэри кытары сатабыллаах, ситимнээх үлэ үтүө түмүктэрдээх. Ол курдук, Елена Тимофеевна салайыытынан Бүтэйдээх оскуолатын үөрэнээччилэрэ улууска ыытыллар элбэх күрэххэ кыайыылааҕынан уонна призерынан буолаллар. Ааспыт сылга “Ааҕар республика” акцияҕа “Эффективные идеи и практики популяризации чтения” номинация хаһаайыннарынан буоллулар.

Семинарга бу бырайыактары сиһилии сырдатар методическай вертушка ыытылынна, 11 кылаас үөрэнээччилэрэ наставник быһыытынан “Буктрейлеры оҥоруу - группа айымньылаах үлэтэ” маастар-кылаас көрдөрдүлэр, 2-4 кылаас оҕолоругар “Болот Боотур “Хоту дойдум оҕолоругар” кинигэтинэн уус-уран сурунаал буолла.

Семинар кыттыылаахтара нэһилиэк түмэлигэр сылдьан элбэх саҥаны биллилэр-көрдүлэр, “Бастыҥ ааҕар кылаас” бырайыак иһинэн ыытыллыбыт инсценировкалар куонкурустарыгар Гран-при буолбут туруорууну көрөн биһирээтилэр.

Дмитриева Т.М., үөрэҕирии салалтатын кыл. специалиһа