Алтынньы 7 күнүгэр улууспут биир кырдьаҕас, баай историялаах К.О. Гаврилов аатынан Бүтэйдээх орто оскуолата төрүттэммитэ үбүлүөйдээх 130 сылын бэлиэтээтэ. Үс сүүстэн тахса араас сылларга үлэлээн ааспыт педагогическай үлэ бэтэрээннэрэ, үлэһиттэр, выпускниктар, ыҥырыылаах ыалдьыттар ыраахтан-чугастан тоҕуоруһа мустаннар үөрэммит, үлэлээбит, кынат үүннэрэн көтүппүт тапталлаах оскуолаларын үөрүүлээх күнүн бэлиэтээтилэр.

Улуус баһылыга Дмитрий Тихонов, СӨ олохтоох бэйэни салайыныы боппуруостарын департаменын салайааччыта, Бүтэйдээх оскуолатын выпускнига Иван Попов, улуустааҕы үөрэҕирии салалтатын начаалынньыга Гаврил Толстяков, үөрэҕирии профсойууһун бэрэссэдээтэлэ Иннокентий Скрябин кэлэн эҕэрдэлээтилэр. Ону тэҥэ, бу күн, өр сылларга Бүтэйдээх оскуолатыгар физкультура учууталынан үлэлээбит Александр Игнатьев 85 сааһын бэлиэтээһин уонна "Олоҕум кэрдиис кэмнэрэ" диэн оҕолоро таһааттарбыт кинигэлэрин презентацията буолла. Александр Васильевич уонна кини кэргэнин, физкультура учууталын, Филиада Дмитриевна ааттара Бүтэйдээх оскуолатын физкультурнай саалатыгар иҥэрилиннэ.

Бүтэйдээх оскуолатын устуоруйатыттан сырдаттахха:

Бүтэйдээххэ үөрэхтээһини 1893 сыллаахха политсыылынайдар саҕалаабыттар.

• 1898 сыл балаҕан ыйын 24 күнүгэр церковнай-приходской оскуоланы В.Я.Слепцов –Хайа Харбыыр уола туттаран астарбыт.
• 1920 сыллаахха былаас уларыйан оскуола уопсай үөрэхтээһин начаалынай оскуолата буолбут. Оҕолор босхо үөрэнэр кыахтаммыттар.
• 1925 сыллаахха начаалынай оскуола 6 кылаастаах буолбут. Атын нэһилиэктэртэн кэлэн үөрэнии оҕо ахсаанын элбэппит – муҥутаан 163 буола сылдьыбыт. 15 оҕолоох бастакы интэринээт арыллыбыт.
• 1928 сыллаахха Мэҥэ улууһугар маҥнайгынан 7 кылаастаах буолбут.
• 1937 сыллаахха оскуола пионерскай үлэҕэ бастаан знамянан наҕараадаламмыт.

Аҕа дойду Улуу сэриитигэр Алтан уонна II Моорук нэһилиэктэриттэн дойдуларын көмүскүү 223 киһи барбытыттан үгүстэрэ Бүтэйдээххэ үөрэммит эдэр дьон этилэрэ.

• 1958 сыллаахха олох сайдыытынан Майа, Төҥүлү кэнниттэн үһүс орто оскуола Бүтэйдээххэ аһыллыбыт.
• 1961 сыллаахха орто оскуоланы бастакы выпуск бүтэрбит.
• 1993 сыллаахха оскуола 100 сааһын көрсүүгэ оскуолаҕа саха саарына Кузьма Осипович Гаврилов аата иҥэриллибит.
• 2003 сыллаахха 264 миэстэлээх саҥа таас оскуола үлэҕэ киирбит.
• 2012 сыллаахха Бэрэсидьиэн Гранын ылбыт, Арассыыйа бастыҥ оскуолата буолбут.
• Быйыл 2023 сыллаахха федеральнай национальнай бырайыагынан хапытаалынай өрөмүөннэнэн үбүлүөйдээх сылын тупсаҕай көстүүлээх көрүстэ.

Бүтэйдээх оскуолатын педагогическай кэлэктиибэ бу күн үөрүүтүн тэҥҥэ үллэстибиттэригэр, оскуола материальнай, техническэй базата хаҥыырыгар күүс-көмө буолбут, бэлэх ууммут күндү ыалдьыттарыгар, выпускниктарыгар барҕа махталларын тиэрдэллэр.

Мэҥэ Хаҥалас улууһун дьаһалтатын пресс-сулууспата