1926 с. оскуолаҕа киириэн иннинээҕи саастаах оҕону үтүөҕэ-кэрэҕэ, билиигэ-көрүүгэ сирдиир оҕо саас биһигэ улууска маңнайгынан Хаптаҕай нэһилиэгэр аһыллыбыта. Ити кэмтэн оҕо биһиктэрэ Мэҥэ- Хаҥалас улууһугар сылтан сыл аайы тэриллэн сайдан испиттэрэ.

Улуустааҕы оскуола иннинээҕи саастаах оҕолор үөрэхтээһиннэрин ситимин уонна Хаптаҕайдааҕы уһуйаан 95 сыллаах өрөгөйдөөх үбүлүөйүн көрсө, «Хомусчааннар» декада биллэрэннэр, араас хабааннаах тэрээһиннэри ыыттылар.

Ол курдук, бастакынан ахсынньы ый 1 кунугэр нэһилиэк иһинэн «Биһиги тапталлаах уһуйааммыт» диэн акция-концерт барбыта. Акцияҕа нэһилиэк бары тэрилтэлэрэ, уһуйаан араас кэмнэригэр иитиллэн тахсыбыт оҕолоро кыттыыны ылбыттара. Салгыы уһуйаан иитиллээччилэригэр «Мин детсадпын таптыыбын, ахтабын» диэн тематическай нэдиэлэ ыытылынна. Онно оҕолор төрөппүттэрин уонна иитээччилэрин кытта уһуйааннарын төрөөбүт күнүгэр бэлэхтэрин араас оҥоһуктарынан  киэргэппиттэрэ, куйаар ситиминэн тахсан бэйэ-бэйэлэрин, иитээччилэри, төрөппүттэри, коллектив үлэһиттэрин, ветераннары эҕэрдэлээбиттэрэ.

Өссө биир истиҥ-иһирэх түгэнинэн буолла бэйэлэрин кэмнэригэр айымньылаахтык, бэриниилээхтик үлэлээн ааспыт ветераннары анаан чиэстээһин. Бу тэрээһин куйаар ситимин нөҥүө ахсынньы ый 8 күнүгэр ыытылынна. Аҕа саастаах коллегаларбыт кырачаан оҕолор уонна уһуйаан үлэһиттэрин эҕэрдэлэрин, ырыа-тойук бэлэхтэрин көрөн, үөрэн-көтөн астынан, ситиһиилэри баҕаран туран бэйэлэрин махталларын тиэртилэр. Кинилэр үтүө санаалара, махталлара, сүбэлэрэ өссө күүстээх, таһаарыылаах үлэҕэ көҕүлүүр, сирдиир.

Маны тэҥэ «Оҕо этим, отон этим» диэн челлендж уонна «Уһуйааным, эҕэрдэ үбүлүөйгунэн!» диэн фотоальбом оҥоһуллан ветераннарбытыгар уонна выпускниктарбытыгар ананан куйаар ситиминэн барда.

Декада чэрчитинэн биир эппиэтинэстээх улахан тэрээһининэн улуустааҕы «Индивидуализация образовательного процесса в ДОУ» диэн научно-практическай конференцияны ыытыы буолла. Конференцияҕа 42 улуус иитээччилэрэ, үрдүк үөрэх кыһаларыттан С.Ф.Гоголев аатынан педагогическай колледж психологияҕа преподавателэ Жиркова Анжелика Васильевна,  колледж дошкольнай салаатын преподавателэ Данилова Кыыдаана Егоровна уонна  СВФУ Педагогическай институтуттан Евдокарова Туяра Валерьевна кыттыыны ыллылар. Конференция бэйэтин сыалын-соругун ситтэ, хас биирдии оҕо уратытын, интириэһин, билиэн-көрүөн баҕарар баҕатын учуоттаан иитиини ыытарга сөптөөх  саҥа киллэриилэри, технологиялары туһаныыга, сайыннарар эйгэни, усулуобуйаны тэрийиигэ сүрдээх үчүгэй үлэ уоппуттара тарҕатылынна.

Ахсынньы ый 15 күнүгэр улууска бастакынан тэриллибит оҕо биһигин 95 сыллаах үбүлүөйүн бэлиэтиир торжественнай чааска «Хомусчаан» оҕону сайыннарар киин ыҥырыылаах ыалдьыттардаах бүтүн коллектив үөрүүлээх быһыыга-майгыга муһунна. Үөрүүлээх тэрээһиҥҥэ улууспут, нэһилиэкпит салайааччылара, заведующайдар кэлэн эҕэрдэлээн, үтүө, алгыс тылларын этэн эҕэрдэлээтилэр, инники сайдыыны торумнаатылар.