Муус устар 15 күнүгэр И.Г. Игнатьев аатынан Хара спортивнай оскуолатыгар Аҕа Дойду Улуу сэриитин уонна килбиэннээх үлэ ветераннарын, Аҕа Дойду сэриитин 2-ис истиэпэннээх уордьаннар уонна элбэх бойобуой мэтээллэр кавалердарын, Кыайыыны ыам ыйын 9 күнүгэр 1945 сыллаахха Берлиҥҥэ көрсүбүт Ефрем Ионович уонна Алексей Ионович Лукиннар үтүө ааттарын үйэтитэн “Арҕас оонньуулара” улуустааҕы байыаннай-спортивнай оонньуулара ыытылыннылар. Күрэхтэһиини Улуу Кыайыы 80 сылыгар анаан Лукиннар аймах уонна Харатааҕы И.Г. Игнатьев аатынан спортивнай оскуола кэлэктиибэ быйыл иккис төгүлүн үрдүк таһымҥа тэрийэн ыыттылар.

Улуустааҕы байыаннай спортивнай оонньууларга: Майа В.П. Ларионов орто, Майа Ф.Г.Охлопков аатынан орто, Советскай Союз Героя Ф.К. Попов аатынан Баатара орто, Павловскай орто, Хорообут орто, Тыыллыма орто оскуолаларын уонна Хара спортивнай оскуолатын хамаандалара кыттыыны ыллыллар. Хамаандалар стойдаан хаамыыга, сыал ытыытыгар, атах оонньууларыгар, военизированнай эстафеталарга уонна канат тардыһыытыгар тыҥааһыннаахтык кииристилэр, илин-кэлин түһүстүлэр. Уопсай түмүккэ кыайыылаахтарынан буоллулар:

1-кы миэстэ – Советскай Союз Героя Ф.К.Попов аатынан Баатара орто оскуолатын хамаандата;

2-үс миэстэ – И.Г. Игнатьев аатынан Хара спортивнай оскуолатын хамаандата;

3-ис миэстэ – Ф.Г.Охлопков аатынан Майа орто оскуолатын хамаандата.

Дьүүллүүр сүбэ быһаарыытынан “Бастыҥ командир” номинация Кривошапкин Егорга Баатара орто оскуолатын үөрэнээччитигэр туттарылынна. Биирдиилээн спорт көрүҥнэригэр бастакы миэстэлэри ыллылар:

• салгын саанан бэргэнник ытыыга – Олейников Аскольд, Хара спортивнай оскуолата;
• атах оонньууларыгар – Петров Максим, Майа Ф.Г. Охлопков аатынан орто оскуола.

Күрэхтэһии үөрүүлээх түгэнинэн Лукиннар аймахтарын ааттарыттан кыайыылаах уонна бары кыттыыны ылбыт хамаандаларга анал бириистэрин туттарыылара буолла. Бастакы миэстэҕэ тахсыбыт Баатара орто оскуолатын хамаандата убаһанан, атын хамаандалар сыаналаах бириистэринэн уонна сертификаттарынан наҕараадаланнылар.

Улуу Кыайыыны уһансыбыт Ытык көлүөнэ дьоммутугар СҮГҮРҮЙЭБИТ! МАХТАНАБЫТ!