Бүгүн, ахсынньы 9 күнүгэр, бүтүн Арассыыйа үрдүнэн Аҕа дойду дьоруойдарын күнүгэр, Улуу Кыайыы 80 сылын түмүктуу, сахалартан бастакы Советскай Союз Дьоруойа Федор Попов 104 сааһын бэлиэтии, И.Г. Тимофеев аатынан Майа лиссиэйин «Бастыҥнар хамсааһыннарын» уонна «Школьный театр» Федеральнай проект иһинэн үлэлиир «Алыптаах мааска» куруһуок эдэр артыыстара Д.Ф. Ходулов аатынан норуот айымньытын дьиэтин үрдүк сыанатыгар испиктээктэри көрдөрөр дьоро киэһээлэрэ ааста.

Тэрээһини лиссиэй дириэктэрэ, педагогическай наука кандидата Татьяна Спартаковна Попова эҕэрдэ тылынан арыйда. Саха Республикатын культура уонна духуобунай сайдыы министрэ Афанасий Иванович Ноев видеонан оҕолорго ситиһиини баҕарда, испиктээк туруоруутугар үлэлэспит бөлөххө, сценарийы суруйбут саха тылын уонна литературатын учууталыгар Тамара Егоровна Слободчиковаҕа, эдэр көрөөччү тыйаатырын туруорааччытыгар Александра Семеновна Скрябинаҕа, тыйаатыр бары коллективыгар улахан махталын биллэрдэ. Бастакынан 6 кылаас үөрэнээччилэрэ (16 оҕо) А.П. Чехов “Хамелеон” кэпсээнинэн испиктээк туруордулар. Оҕолор олус итэҕэтиилээхтик, уобарастарыгар киирэн, күлүүлээх кэпсээн ис хоһоонун арыйдылар. Ол кэннэ 7/1 кылаас үөрэнээччилэрэ (22 оҕо) Тимофей Сметанин «Егор Чээрин» сэһэнигэр олоҕурбут инсценировканы көрдөрдүлэр. Эдэр артыыстары көрөөччүлэр сүрдээҕин сөбүлээн ылыннылар. Ону таһынан улахан кылаас иитиллээччилэрэ (44 оҕо) киэҥ туттар киһибит, биир дойдулаахпыт, хорсун буойуммут Федор Кузьмич Попов кылгас да буоллар чаҕылхай олоҕун, кистэлэҥ тапталын, доҕордорун кытта сыһыанын, оҥорбут хорсун быһыыларын көрдөрөр олус долгутуулаах “Тыыннаах сулус” испиктээги туруордулар. Сүөдэр уобараһын Максим Эверстов, оҕо сааһын көрдөрбүт Айсиэн Борисов олус итэҕэтиилээхтик, киһи сүрэҕин иһинэн киирэр гына көрөөччүлэргэ тириэртилэр. Сааланы толору мустубут көрөөччүлэр иһийиэхтэринэн иһийэн олорон биир тыынынан көрдүлэр.

Онон, бу тэрээһин эдэр ыччаты иитэр-такайар сүдү суолталаах, дьоруой Федор Попову холобур оҥостоллоругар, дойду историятын туьунан үөрэтэллэригэр төһүү күүс буолла. Улахан махталбытын биллэрэбит бары үлэлэспит лиссиэй үлэһиттэригэр, күүс-көмө буолбут төрөппүттэргэ, норуот айымньытын дьиэтин коллективыгар. Баҕарыахпыт этэ эдэр артыыстарга муҥура суох өрөгөйү, чаҕылхай айар кыайыылары.