Ахсынньы 8 күнүгэр Дьабыыл нэһилиэгэр саха биллиилээх лингвист-учуонайа, суруйааччы, тылбаасчыт Г.В. Баишев - Алтан Сарын төрөөбүтэ 125 сылыгар аналлаах улуустааҕы “Ийэ тыл этигэн күүһэ” научнай-практическай кэмпириэнсийэ үрдүк таһымнаахтык ыытылынна.

Кэмпириэнсийэ сыала-соруга:

• Г.В. Баишев-Алтан Сарын аатын үйэтитии;
• Кэнчээри ыччаты ийэ тылын харыстыырга, таптыырга угуйуу;
• Ийэ тыл билим эйгэтигэр туттуллуутун кэҥэтии;

Кэмпириэнсийэ  хайысхалара:

• “Тыл хонуута” үөрэнээччилэргэ аналлаах айар күрэх;
• Билиҥҥи саха тылын чинчийии (тылбаас, терминология, орфография, саха суругун тылын сүрүн кыһалҕалара уо.д.а.);
• Сахалыы тылбаастаммыт ойуулуктары сахалыы билим тиэрминнэри туһаныы;
• Уруоктарга сахалыы билим тиэрминнэри туһаныы;
• Билиҥҥи кэмҥэ ийэ тыл, култуура үөрэҕин кыһалҕатын, ньыматын быһаарыы мөккүөрдэрэ;
• Оскуола иннинээҕи саастаах оҕону ийэ тылынан үөрэтии уонна сайыннарыы.

Барыта 21 улуус учууталлара, үөрэнээччилэрэ, уһуйаан, култуура үлэһиттэрэ кыттыыны ыллылар.

Ыҥырыылаах ыалдьыттар: Мэҥэ Хаҥалас улууһун үөрэҕириигэ салалтатын методиһа М.П. Нестеров, Мэҥэ Хаҥалас улууһун култууратын начальнигын солбуйааччыта А.С. Кулешов, култуура министерствотын социокультурнай үлэҕэ уонна муниципальнай тэриллиилэри кытары бииргэ үлэлэһиигэ отделын салайааччыта В.А.Моисеева.

Эспиэр быһыытынан үлэлээтилэр: Васильева Н.М., ИГИиПМНС СО РАН сүрүннүүр үлэһитэ, филология билимин хандьыдаата; Дьячковскай Е.Р., ИГИиПМНС СО РАН сүрүннүүр үлэһитэ, филология билимин хандьыдаата; Багдарыын Ньургун Сүлбэ уола, ИГИиПМНС СО РАН, филология билимин хандьыдаата; Петров А.А, “Айар” национальнай кыһа эрэдээктэрэ; Баишев Р.А., Алтан Сарын аймаҕа; Петрова М.Г., И.Г. Тимофеев аатынан Майа лицейын үрдүкү категориялаах саха тылын уонна литэрэтиирэтин учуутала; Слепцова М.С., А.С. Шахурдин аатынан Төҥүлү орто оскуолатын үрдүкү категориялаах саха тылын уонна литэрэтиирэтин учуутала; Сидорова Е.А., Н.В. Петров аатынан Дьабыыл орто оскуолатын бастакы категориялаах саха тылын уонна литэрэтиирэтин учуутала; Масаха Михаил Иванович, Мэҥэ Хаҥаластааҕы кыраайы үөрэтэр түмэл дириэктэрэ; Брызгалов Дь.С, педагогика билимин хандьыдаата, Н.В. Петров аатынан Дьабыыл орто оскуолатын “Илгэ” төрүт дьарык үлэһитэ.

Кэмпириэнсийэ түмүгэр бастыҥнар үрдэл уонна үктэл суругунан наҕараадаланнылар. Алтан Сарыҥҥа аналлаах кэмпириэнсийэ 3 сылга биирдэ ыытыллар буолуоҕа. Бары кыттааччыларга махтал! Кыайыылаахтарга эҕэрдэ!

Дьабыыл орто оскуолатын пресс-киинэ