Мэҥэ Хаҥалас улууһун Алтан орто оскуолата төрүттэммитэ 75 сыллаах үбулүөйүн көрсө быйыл успуорт саалатын өрөмүөннэтэн дьоһун бэлэх оҥоһунна.

Сыллата СӨ үрдүнэн үөрэх министиэристибэтэ тыа оскуолаларын успуорт саалаларын өрөмүөнүгэр федеральнай үптэн уопсайа 6 кубуотаны көрөр.

Алтан оскуолата үбүлүөйдээх сылыгар «Успех каждого ребенка» федеральнай бырагыраамаҕа тиксэн үөрүүтэ икки бүк. СӨ «Ил Түмэн» судаарыстыбаннай мунньаҕын дьокутаата Михаил Гуляев, «Биир ньыгыл Арассыыйа” баартыйа быһаччы көмөтүнэн уонна улуус салалтатын, үөрэх управлениетын өйөбүллэринэн хапытаалынай өрөмүөн ыытыллан саҥардыллыбыт успуорт саала төһө да уустук кэмҥэ оҥоһулуннар силигин ситэн үлэҕэ киирбит. Саҥардыллыбыт, эбии пристройдаммыт, сырдык, сылаас саалаҕа успуорт араас көрүҥнэригэр ситиһиилэр кэлэ туралларыгар Өрөспүүбүлүкэ, улуус салайааччылара баҕа санааларын тириэртилэр. Үөрүүлээх күн СӨ үөрэҕин миниистирин солбуйааччыта Владимир Тихонов, СӨ «Ил Түмэн» Судаарыстыбаннай Мунньаҕын дьокутаата Михаил Гуляев, улуус баһылыга Николай Старостин, улуустааҕы үөрэх управлениетын начаалынньыга Ирина Черкашина кыттыыны ылан кэлэктиип үөрүүтүн үллэһиннилэр. Бүгүн тыа сирин оскуолаларыгар хаачыстыбалаах үөрэх сүрүн сорук быһыытынан турар. Инникитин оскуола материальнай-техническэй баазатын саҥардыыга утумнаах үлэни ыытар. Бу күн оскуолаҕа өр сылларга бэйэлэрин киэҥ билиилэрин биэрбит, олохторун оҕо иититигэр-үөрэтиитигэр анаабыт бастыҥ учууталларга, үлэһиттэргэ наҕараадалары туттардылар.

Зоя ГЕРАСИМОВА.