Бүгүн, алтынньы 9 күнүгэр, Майа сэлиэнньэтигэр Д.Ф. Ходулов аатынан култуура киинигэр педагогическай үлэ бэтэрээннэрэ, Россия норуотун үөрэҕириитин туйгуна, Россия профсоюзтарын федерациятын «За активную работу в профсоюзах», «Победитель социалистического соревнования» анал ааттар хаһаайына, Прокопий Константинович Старостин уонна Саха АССР үтүөлээх учуутала, Үлэ Кыһыл Знамята уордьан кавалера, Мэҥэ-Хаҥалас оройуонун Бочуоттаах олохтооҕо Семен Дмитриевич Егоров төрөөбүттэрэ 90 сылыгар аналлаах, “Ахтан-санаан ааһыаҕыҥ» урукку кэмҥэ бииргэ үлэлээбит коллегаларын, билигин үлэлиир оскуола салалталарын уоннна профсоюзтарын председателлэрин кыттыылаах истиҥ-иһирэх тэрээһин буолан ааста.

Тэрээһини Старостин П.К. улуус үөрэҕин боропсойуустарын (14 сыл) уонна Егоров С.Д. үөрэх салалтатын сэбиэдиссэйинэн (17 сыл) салайбыт опыттарын тула кэпсэтии, кинилэр кэмнэринээҕи улуус үөрэҕин үлэтин сырдатыы быһыытынан ыытылынна.

Көҕүлэччилэринэн Андреев С.А. уонна Илларионов А.П., Шишигина Ф.В. тэрийээччилэринэн Мэҥэ-Хаҥалас үөрэҕин салалтата, салайааччы Плотникова И.М., үөрэх үлэһиттэрин улуустааҕы профсоюһун президиума, председатель Скрябин И.М., Майа лиссиэйэ, директор Попова Т.С. буоллулар.

Старостин П.К. төрөөбүт нэһилиэгиттэн Негнюров Н.С. уола Н.П. Старостин, Егоров С.Д. төрөөбүт нэһилиэгиттэн Родионов К.К. уола Егоров С.С. кэлэн олохторун кэрчик кэмнэрин сырдаттылар. Майаттан, Дьокуускайтан, Ороссолуодаттан, Тумултан, Томтортон, Бүтэйдээхтэн элбэх бииргэ үлэлээн ааспыт коллегалара, доҕотторо үөрэнээччилэрэ кэлэн ыалдыттаатылар, үтүө тыллары эттилэр.