Кулун тутар 24-26 күннэригэр улуус оскуолаларын 8 кылааһын уолаттарыгар үс хонуктаах учебнай полевой сбордар буолан аастылар. Учебно-полевой сбордар Улуу Кыайыы 80 сылынан, Аҕа Дойдуну көмүскээччи сылынан Улуус үөрэҕириитин ситимин сүрүн тэрээһиннэрин былаанын чэрчитигэр киирэр патриотическай тэрээһин уонна уол оҕону туһаайан иитэр суолталаах ыытылыннылар.

Улуус бары оскуолаларын кустовой методическай холбоһуктарынан бөлөхтөргө арааран учебно-полевой сбордар 5 оскуолаҕа тэрилиннилэр. Ол курдук Майа В.П. Ларионов аатынан (директор Васильев П.В.), Аллараа Бэстээх М.Е. Попов аатынан (директор Стручков Ф.А.), Төҥүлү (Десяткин С.Н.), Наахара (Старостин П.В.) орто оскуолаларыгар уонна Хара орто спортивнай оскуолатыгар (Оконешников А.А.) барыта 116 үөрэнээччи кыттыылаах үрдүк таһымҥа ыытылыннылар.  

Ахсыс кылаас уолаттара быйылгы үөрэх сылыттан саҥа киирбит “Основы безопасности и защиты Родины” предмет федеральнай программатынан “Основы воинской службы” раздел практическай чааһын уонна байыаннай дьыала бастакы сатабылларын үөрэҕин үс күн устата  аастылар. Ону таһынан юнармеецтар “Эр санаа” уруоктарыгар, бойобуой дьайыылар бэтэрээннэрин кытта көрсүһүүлэргэ, сэрии историятын лекцияларыгар уо.д.а. Аҕа дойдуга бэриниилээх буолууга туһаайыллар тэрээһиннэргэ кыттыыны ыллылар. Бары сбор кыттыылаахтарын интириэстэрин тардыбыт дьарыктарынан пилота суох көтөр аппараттары  (БПЛА) үөрэтии, спортивнай ориентирование, суһал медицинскэй көмөнү оҥоруу дьарыктара, байыаннай спортивнай оонньуулар уонна эт-хаан өттүнэн кыахтаах буолуу нормативтарын туттарыы буоллулар.

Үс хонуктаах сбордар түмүктэринэн хас биирдии үөрэнээччигэ учебно-полевой сбору ааспытын туоһулуур зачетнай книжкалар, бастыҥ юнармеецтарга грамоталар уонна байыаннай спортивнай оонньуулар кыайыылаахтарыгар дипломнар туттарылыннылар. Уолаттар элбэх саҥаны билэн, сатабыллары баһылаан, биир саастыылаахтарын кытта алтыһан,  саҥа элбэх табаарыстанан тарҕастылар.

Тэрээһин ыытыллар оскуолаларыгар учебнай-полевой сбор эйгэтэ: оҕолор хонор, аһыыр, үөрэнэр уонна дьарыктанар усулуобуйалара сөптөөхтүк тэрилиннэ. ОБЗР, физкультура уонна иитэр үлэ педагогтара биир хамаанда буолан, айымньылаах, кыһамньылаах уонна бэриниилээх үлэлэрин түмүгэр улуустааҕы үс күннээх учебнай-полевой сбордар үрдүк таһымҥа ыытыллара ситиһилиннэ.