Сэттэ үйэ тухары,

Сэриэдийэ турар

Кэнчиэрийбэт кэхтибэт

Олоҥхо тыла

Кэтит кэскил буолуохтун

Сэтинньи 30 күнүгэр Төхтүр “Мичил” уһуйааныгар олоҥхону иилээн-саҕалаан үлэлэтэ сылдьар, улууска, республикаҕа биир биллэр уһуйааччыбыт, олоҥхо педагог маастара Айталина Николаевна Верховцева "Олоҥхо-уран тыл кылаана" диэн айар тэрээһинэ, айымньылаах отчуота буолан ааста.

Иитээччи Айталина Николаевна айымньылаах үлэтин уопутун үллэстэр тэрээһинигэр Олоңхо тематыгар икки аһаҕас дьарык ыыттта: "Сир бадылы Ууһа", "Ахсаан олоҥхо эйгэтигэр". “Мичил” уһуйаан бары педагогтара, Айталина Николаевна көҕүлээһининэн, оҕолорго олоҥхо эйгэтин хайдах тиэрдэри тоҕус хайысханан үлэлии сылдьар үлэлэрин сырдаттылар, араас оҥоһуктары, методическай пособиелары көрдөрдүлэр. Ол курдук олоҥхону талан, кэрчиктээн детсад саастаах оҕолорго сөп түбэһэр гына бэчээттээн тэттик кинигэлэри Айталина Николаевна таҥмытын, араас дьэрэкээн оҥоһуулаах ооньуулары, оонньуурдары, олоҥхону туруорууга декорациялары, муузуканы талыыны уонна ордук олоҥхону робототехникаҕа сыһыаран үлэлиир Марфа Константиновна Холмогорова кэпсээнин мустубут дьон сэҥээрдилэр.

Айымньылаах отчуот иккис чааһыгар Айталина Николаевна салайааччылаах иитээччилэр айар дьоҕурдарын арыйан талааннарын көрдөрдүлэр. "Дыырай Бөҕө"олоҥхоттон быһа тардан, фольклор бары көрүҥүттэн киллэрэн толоруулара, ону таһынан "Мэнигийээн" бөлөх сценкатын, тэттик киинэлэри семинарга кэлбит ыалдьыттар сэҥээрэ көрдүлэр.

Айар тэрээһини Айталина Николаевна уһуйаантан таһаарбыт оҕолоро Муся Аммосова, Тимур Неустроев, Дьаҥхаады нэһилиэгин аҕам саастаах "Оллоон" олоҥхо бөлөхтөрө киэргэттилэр. Тэрээһиҥҥэ Мэҥэ- Хаҥалас улууһун 9 уһуйааныттан, олоҥхону сэҥээрэр, кырачаан оҕолорго үөрэтэр баҕалаах 20 педагог кэлэн көрөн-истэн, сэргээн, уопут атастаһан бардылар: Майаттан "Кэнчээри", "Мичил" "Чуораанчык" уһуйааннара, Аллараа Бэстээхтэн "Сказка", "Солнышко", Бүтэйдээхтэн "Чэчир", Баатараттан "Кэскил" уһуйааннар уонна Чуйя оскуола-саада. Тэрээһин түмүгэр мустубут иитээччилэр, нэһилиэк аҕа баһылыга Стручков В.Н., олохтоох культура эйгэтин үлэһиттэрэ, нэһилиэк ветераннара төгүрүк остуолга санааларын эттилэр, Айталина Николаевна айымньылаах үлэтин үрдүктүк сыаналаатылар, өссө да үтүмэн элбэх ситиһиини баҕаран тарҕастылар.

#ГодПедагогаНаставника
#ГПН_2023
#ГПН_МКулус