Ахсынньы 21 күнүгэр Владимир Петрович Ларионов аатынан Майа орто оскуолатыгар саҥа тутуу үлэҕэ киирдэ. Саҥа дьиэҕэ “Агросфера “Үнүгэс”” диэн аат иҥэриллиннэ. Манна тыа хаһаайыстыбатыгар сыһыаннаах билим уонна чинчийии үлэтин ыытарга аналлаах лаборатория, оранжерея ону кытары, кыра оҥорон таһаарар производства салаата арылынна.

Тэрээһини эҕэрдэ тылынан саҕалаата оскуола дириэктэрин эбээһинэһин толорооччу Толстяков Гаврил Николаевич. Кини тутуу үлэтэ хайдах барбытын сырдатта, бииргэ үлэлэспит, көмөлөспүт дьоҥҥо махтал тылын тиэртэ. Эҕэрдэлии, үөрүүнү үллэстэ кэллилэр: "Мэҥэ-Хаҥалас улууһа" МО баһылыга Тихонов Д.И., Майа сэлиэнньэ баһылыга Неустроев А.И., “Мэҥэ-Хаҥалас үөрэх салалтата” МКТ начальнигын солбуйааччыта Захаров А.В., Саха Өрөспүүбүлүкэтин агро хайысхалаах оскуолаларын сойууһун толорооччу дириэктэрэ Дягилев П.Г., Арктикатааҕы судаарыстыбаннай агротехнологическэй үнүбэрсиэт ректорын солбуйааччыта Нифонтов К.В., агротехнологическэй бакылтыатын декана Сидоров А.А., билим сүбэлээччитэ Аржакова А.П. уонна инжэниэрнэй бакылтыат декана Александров Н.П. Бииргэ хайдах үлэлэһэри, инники былааны ырытыы, саҥа ньымалары олоххо киллэрии туһунан таһаарыылаах кэпсэтии барда.